МИЦОТАКИС ГИ БАРА НАЗАД СКУЛПТУРИТЕ ОД БРИТАНСКИОТ МУЗЕЈ, НО… „Чекавме стотици години, ќе истраеме во преговорите“

Разговорите за можното враќање на мермерите од Партенон од Британскиот музеј во Грција не напредуваат доволно брзо, рече грчкиот премиер пред неговата средба со британскиот премиер Риши Сунак оваа недела, пишува Гардијан. Кирјакос Мицотакис го спореди поседувањето на скулптурите кои некогаш стоеле на Акрополот во Атина со сликата на Мона Лиза која е пресечена на половина, велејќи дека тоа не е прашање на сопственост, туку „повторно обединување“.

– Исто како да ви реков да ја преполовите Мона Лиза, половина ќе ја имате во Лувр, а половина во Британскиот музеј. Мислите ли дека вашите гледачи би ја ценеле убавината на сликата на тој начин? Па, токму тоа се случи со скулптурите на Партенон – рекол Мицотакис за Би-Би-Си, но додал дека е трпелив човек и дека „чекавме стотици години и јас ќе истраам во овие дискусии“.

Атина долго време води кампања за враќање на мермерните украси земени од урнатините на Партенон од лордот Елгин, британскиот амбасадор во Отоманската империја тогаш владеел со Грција, на почетокот на 19 век.

Грција го изгради музејот на Акропол во 2009 година за да ги смести скулптурите што останаа во земјата, заедно со други артефакти, и токму таму Мицотакис сака да се вратат скулптурите.

– Чувствуваме дека скулптурите ѝ припаѓаат на Грција и дека во суштина се украдени. Мислам дека одговорот е многу јасен. Тие навистина изгледаат подобро во музејот Акропол, најсовремен музеј кој е изграден за таа намена – изјавил Мицотакис.

Мицотакис рече дека ќе го покрене ова прашање со Сунак во вторник, еден ден по средбата со лидерот на лабуристите, Кир Стармер.

Фајненшл тајмс објави дека Стармер, кој ја претставува изборната единица Холборн и Сент Панкрас каде се наоѓа Британскиот музеј, нема да блокира „заемно прифатлив“ договор за заем за скулптурите.