МИЦКОСКИ ТВРДИ ДЕКА УТРЕ НЕМА НИШТО ДА СЕ СЛУЧИ Политичките „глодари“ од ДУИ знаат како Уставниот суд ги носи одлуките
Премиерот рече дека на раководството на ДУИ му е јасно како функционира судот и дека во детали ги бираше уставните судии.
Утре во Уставниот суд нема да се случи ништо. Целата ситуација е под контрола. Уставниот суд може да работи на законот за јазици неколку месеци, па и години. Ова добро го знаат во ДУИ и сега се обидуваат да извршат политички притисок, но ги повикувам граѓаните да бидат смирени и да не дозволиме да наседнеме на провокациите на овие луѓе, изјави премиерот Христијан Мицкоски запрашан за коментар за објавените документи во јавноста дека утре Уставниот суд нема да одлучува околу евентуалната укинување на службената употреба на албанскиот јазик.
Мицкоски рече дека на раководството на ДУИ му е јасно како функционира судот и дека во детали ги бираше уставните судии.
– Нивната цел беше сега како политички глодари да начекаат и да видат дека, еве сега знаеме како одат процедурите и ние ќе правеле политички притисок. И кога ништо утре нема да се случи, да излезат во јавноста и да кажат еве поради тоа што ние правевме притисок, се одложи сето ова. На нив многу им е јасно како функционираат работите. Ги молам нашите сограѓани Македонци, Албанци и сите да бидат смирени и да не дозволиме да наседнуваме на провокациите на овие луѓе. Не ни е потребно. Тие луѓе завршија на 8-ми мај кога ја изгубија власта. Ништо нема да се случи. Целата ситуација е под контрола – рече Мицкоски.
Тој додаде дека став на венецијанската комисија е дека 3 члена од законот а јазици се неуставни, а не на поединци на ВМРО-ДПМНЕ.
– Венецијанската комисија беше таа која што рече дека тие 3 члена од законот се неуставни, а ставот на партијата го знаете. Многупати сме го кажале и нема да го повторувам – рече Мицкоски.