МИЦКОСКИ ИНИЦИРА ДОГОВОР ЗА СЛОБОДНА ТРГОВИЈА СО САД Со тоа би се запечатило Стратешкото партнерство

Царините од 33 отсто што ни ги воведе САД се очекувани. Тоа беше јасно веднаш после инаугурацијата на претседателот Доналд Трамп и тој тоа го кажа, вели премиерот Христијан Мицкоски.

– Ниедна земја во Европа не беше подготвена за тоа и никој не се подготвува претходно. Кога е проблемот тука се седнува на маса и се разговара – рече Мицкоски.

Додаде и дека во нашиот царински тарифник за некои групи на производи имаме царини  кон САД повисоки од 60 проценти.

Мицкоски нагласи дека предложил да се потпише договор за слободна трговија со САД.

– Уште во јануари со тогашниот заменик на помошникот државен секретар, Александар Касаноф разговаравме за потпишување на билатерален договор во рамките на Стратешкиот дијалог меѓу двете земји, во делот на економијата и трговијата. Уште тогаш почнавме, знаејќи дека ќе следат вакви процеси. Мислам дека тоа беше вистинскиот пат кој почнавме да го чекориме. Потоа, како дел од целиот овој процес од наша страна се предложи да потпишеме договор за слободна трговија со САД и да нема царини. Дадов налог нашите надлежни институции да видат дали можеме да потпишеме ваков договор, согласно важечките договори и истото му го предложив на државниот секретар за трговија на САД, Хауард Лутник – рече Мицкоски во интервју за ТВ Алфа.

Тој додаде дека денеска во Брисел на оваа тема со секретарот Лутник разговарал и министерот за надворешни работи Тимчо Муцунски, како и со уште еден висок претставник на Белата куќа, одговорен за Балканот.

– Од сите страни ова е поздравено како одлична идеја. Доколку е возможно и доколку го направиме, ова би било исклучителен чекор напред со кој би се потврдило и запечатило Стратешкото партнерство – рече Мицкоски.

За американските царини кон ЕУ во износ од 20 проценти Мицкоски рече дека ќе имаат секундарни ефекти врз нашата економија, бидејќи не е битна земјата на потекло, туку каде одат парите.

– Очекувам дијалогот помеѓу ЕУ и САД, што ќе се развие во периодот кој што следи, да резултира со договор и дека ќе изнајдат начин да најдат решение или излез од оваа ситуација. Тоа е поголема опасност, бидејќи ние во суштина во 2024 година според податоците на нашиот Државен завод за статистика во САД имаме извезено стока во вредност од околу 110 милиони евра, а увезено 180 милиони евра и сме во дефицит. Оваа година во јануари имаме суфицит и имаме извезено околу 21 милион евра, а имаме увезено 12 милиони евра. Како производ најмногу извезуваме автобуси кои ги произведува странскиот инвеститор во Скопје. Тие како потекло се од тука, а земјата која ги продава е Белгија, бидејќи таму е седиштето на компанијата – појасни Мицкоски.