Мицкоски: Го охрабрувам Филипче да се врати на лекарската професија

Луѓе кои го знаат Венко Филипче го оценуваат како сосема коректен човек и квалитетен лекар. Го охрабрувам по политичката кариера, да се врати да биде лекар, рече претседателот на ВМРО-ДПМНЕ Христијан  Мицкоски во „Отворено студио“ на ТВ 24.

– Ако Филипче продолжи со политика, ќе мора да внимава на јавните набавки – рече лидерот на најголемата опозициска партија.

Мицкоски оцени дека лекарите со оглед на условите во кои работат, добро се справиле со коронавирусот и смета дека ако имале подобри услови, ќе одговореле подобро на епидемијата.

– По бројот на луѓето кои што го загубиле животот на милион жители во регинонот, ако го анализираме државите од Словенија да речеме преку Босна, Хрватска, Црна Гора, Бугарија, Турција, Албанија, Грција, Македонија итн. Македонија е втора по смртност веднаш позади Словенија. Ако го гледаме бројот на заболените на милион жители ќе видиме дека сме трети. Ако го гледаме пак бројот на тестирани од 10 сме на седмо место – истакна Мицкоски.

Во врска со изградбата на Клиничкиот центар, Мицкоски рече дека партијата во програмата со која планирале да излезе, имале поинаков пристап и дека тие пари за тој центар, 500 милиони евра, и дека не треба да инвестираат во цигли, туку во човечкиот ресурс.

„Затоа имавме поинаков пристап и тоа ќе биде содржано во програмата. Да фрлите толку пари без да кажете збор за обуката и образованието на медицинскиот персонал, ценевме дека ќе има сомнителна намера. Тие пари нема никогаш да се случат. Да не заборавиме дека многу медицински лица си заминаа од државата.“ – рече Мицкоски.

Тој рече дека ВМРО-ДПМНЕ со  програмата со која што планираше да излезе на предвремените парламенарни избори имаше поинаков пристап од аспект на здравството и ценеше  дека тие пари кои што се предвидоа за тој клинички центар од 500 милиони евра, се фрлени пари.