МЕТ ГАЛА 2026 ИМА НОВИ СПОНЗОРИ Дали Џеф Безос и Лорен Санчез тукушто ја осудија манифестацијата на пропаст?
Именувањето на милијардерот Џеф Безос и неговата сопруга Лорен Санчез за главни финансиски покровители на најголемиот моден настан, ја нарушува традицијата главен спонзор да биде голема модна куќа – нешто што отсекогаш било суштински дел од идентитетот на настанот.
Додека милијардерот од Амазон Џеф Безос и неговата сопруга Лорен Санчез се најавуваат како финансиски поддржувачи на најголемиот настан во социјалниот календар на А-листата, новинарката Ели Мјур од „Индепендент“ истражи што значи нивното вклучување за институцијата и за продорот на парот во културната доминација.
Џеф Безос ѝ подари на својата сопруга подарок каков што може само милијардер: дел од Мет Гала 2026 година.
Метрополитен музејот на уметност објави во неделата дека модната екстраваганција следната година ќе биде „овозможена“ од третиот најбогат човек во светот и неговата сопруга, Лорен Санчез Безос, кои беа именувани за главни спонзори, покрај секундарните донатори, Condé Nast и Saint Laurent.
Во нивната нова улога, двојката ќе раководи со сè, од покани до логистика и целокупна презентација на настанот. Замислувам модни фустани доставени во картонски кутии од Амазон, црвениот тепих стримуван на Prime Video и познати личности катапултирани во Њујорк со ракетата Blue Origin на Безос (добро, последново е можеби малку преамбициозно) – пишува Индепендент.
Секако: ова е веројатно сонот на Санчез, а не на Безос. Се смета дека поранешната новинарка одиграла клучна улога во ребрендирањето на својот сопруг од технолошки фанатик на Aмазон во член на глобалната елита облечен во смокинг. Купувањето место во најголемиот настан од А-листата во општествениот календар се чини дека е дел од планот за културна доминација.
Очекувањата се дека Мет Гала во мај ќе биде нешто сосема поразлично. Нивното именување ја нарушува традицијата главен спонзор да биде голема модна куќа – нешто што отсекогаш било суштински дел од идентитетот на настанот.
Како минатогодишен главен спонзор, Луј Витон доминираше на црвениот тепих облекувајќи ѕвезди како Сабрина Карпентер, Фарел Вилијамс и Зендаја.
Спонзорот е исто така клучен во комуницирањето на насоката на настанот, па затоа поврзаноста со милијардерот, извршен директор на Амазон, се чини, благо кажано, неконвенционална (особено затоа што онлајн трговецот на мало претежно продава евтина, брза мода).
Подгответе се и за либерални намигнувања на сметка на империјата на доставата. Ова не е првото филантропско родео на Безос. Насвеченоста за Советот на модни дизајнери на Америка претходно оваа година – каде што Фондот на Безос учествуваше со иницијатива од 6,25 милиони долари – една од водителките, Тејана Тејлор, ја пофали дводневната достава на Амазон. Кога станува збор за пакети и време на испорака, суптилноста никогаш не е на менито.
Инаку, парот има импресивна листа на контакти. На нивната венчавка во Венеција, проценета на 400 / 500 милиони долари, беа поканети Бил Гејтс, Опра Винфри, Леонардо Дикаприо, Иванка Трамп и Кардашијан. Можно е списокот на гости за Мет Гала да се прошири со имиња од политичките и бизнис-елити.
Наводно, тие го поддржаа Доналд Трамп на неговата инаугурација, а присуствуваа и личности како актерката Сидни Свини, што сугерира потенцијално поширок спектар на гости.
Можеби можевме да го предвидиме ова. Само неколку дена по свадбата во Венеција, Санчез се појави на дигитална насловна страница на американскиот Вог во нејзината венчаница од Долче и Габана со натпис: „Еве ја невестата!“. Покрај тоа, Санчез е фотографирана на настани со Ана Винтур, глобалната уредничка на Вог и главна директорка за содржини на Конде Наст, која претседава со Мет Гала од 1995 година.
Преземањето на Мет Гала од страна на двојката е важно за уметноста – но веројатно не од филантропските причини за кои е наменета. Ова е уметничка институција која – иако со холивудски сјај – има длабоки корени. Основана во 1948 година, од познатиот моден публицист Ламберт, настанот започна како собирање средства за Институтот за костими на Мет, служејќи како прослава на отворањето на неговата годишна изложба. Листата на гости во голема мера беше составена од општествената елита на Њујорк, музеи и модни инсајдери, но имаше малку присуство на познати личности.
Под дизајнот на Винтур уште од деведесеттите години, Мет Гала стана повеќе очекувана и од Оскарите. Ова е настан кој на прв поглед ги слави познатите, но исто така е и платформа за креативците, креаторите, дизајнерите, стилистите и шминкерите.
Секоја година, дизајнерите – нови и веќе етаблирани – нудат своја уникатна интерпретација на новата тема и создаваат дизајни што ги поместуваат границите, честопати дефинирајќи ја мивната кариера и станувајќи дел од историјата на модата.
Во модерното доба на поп-културата, Мет Гала стана само порелевантна. Иако само на малкумина им е дозволен пристап, на социјалните медиуми се случува сосема поинаква забава – каде што легии обожаватели стануваат модни критичари од фотелја само за една ноќ, испитувајќи го секој изглед и неговата вредност.
Дури и ако настанот не се покаже како парада на логоа на Амазон, значењето на спонзорството на Безос е подлабоко. Секако, ова е настан за собирање средства кој отсекогаш барал корпоративно финансирање во позадина – вид пари што само технолошките компании се чини дека ги имаат денес – но преземањето на Безос нагласува потемна промена во културата, каде што креативните платформи, институциите, па дури и медиумите се сè повеќе контролирани од неколку моќни играчи. Само порано оваа година, студиото „Амазон МГМ“ на Безос обезбеди целосна креативна контрола врз франшизата за Џејмс Бонд, предизвикувајќи загриженост за иднината на франшизата.
Неговата културна доминација нема да запре тука. Се сугерираше дека Безос еден ден би можел да го купи издавачот на „Вог“, „Конде Наст“, и да ѝ даде на својата сопруга некакво учество во престижното издание, иако ова е само шпекулација. Сепак, не е сосема неразбирливо, со оглед на финансиските предизвици со кои се соочува медиумската индустрија во моментов. Какви и да се намерите на Безос и неговата сопруга, се обложувам дека тие само што почнуваат – вели новинарката.