📽️ 📷 МАКЕДОНСКА ПЕСНА ОДЕКНА НАЈСИЛНО ВО ЈЕСОЛО Хорот на ООУ „Кузман Јосифовски-Питу“ со лавина награди во Италија
Хорот од ООУ „Кузман Јосифовски – Питу“ од Скопје освои пет први места и повеќе награди на меѓународен фестивал во Италија, потврдувајќи ја силата на македонскиот мелос.
Во време кога често се отвора прашањето дали младите ја негуваат македонската музичка традиција, учениците од хорот на ООУ „Кузман Јосифовски – Питу“ од Скопје дадоа јасен одговор, македонскиот мелос не само што живее, туку и освојува европски сцени.
На престижниот меѓународен хорски фестивал во Лидо ди Јесоло, хорот под водство на маестро Вера Aнгеловска постигна извонреден резултат и се врати со серија награди што ја потврдуваат нивната доминација.
Учениците под диригентската палка на Ангеловска постигнаа извонреден успех, освојувајќи: Прво место за хорот, 4 први места за солисти, 4 втори места и 4 трети места
Овој успех претставува уште една потврда дека македонската музичка традиција може рамноправно да се носи со најдобрите европски хорски ансамбли.
Настапите биле изведени со внимателно одбрани композиции од македонскиот музички фолклор, со што младите изведувачи ја пренеле автентичната емоција и богатството на националното музичко наследство.
Жирито, според информациите, посебно ја ценело не само техничката прецизност, туку и енергијата и искреноста на настапите, кои биле наградени со силни овации.
Ова е втора година по ред хорот од Скопје да бележи големи успеси во Италија, што дополнително го зацврстува нивниот статус како еден од најуспешните младински хорски состави од регионот.
Зад целиот проект стои долгогодишната работа на маестро Ангеловска, која со години гради генерации млади музичари и го пренесува духот на македонската песна.