МАКЕДОНИЈА ПРЕД НОВ ЕКОНОМСКИ ПРЕДИЗВИК Додека Германија и Европа трпат големи загуби, нашата економија се соочува со неизвесност

Воведувањето на високата царинска тарифа на САД кон нашата земја ќе има индиректен ефект пред се врз автомобилската и петрохемиската индустрија во земјава, сметаат дел од економските експерти во земјава. Тие се согласни дека земјава учествува со многу мал процент во увозот на САД, но дека глобалната економија влегува во една голема неизвесност што секако ќе се одрази и кај нас во делот на приливот на странски инвестиции.

Според универзитетскиот професор Трајко Славевски, станува збор за мал директен ефект што земјава би го имала затоа што учествуваме со многу мал процент во увозот на САД, речиси незначителен, а од друга страна САД се на 24 место на листата на наши трговски партнери. Нашите стратешки партнери како што е Германија, смета професорот Славевски, се повеќе погодени, а тоа секако ќе се одрази и врз нашата економија.

– За глобалната економија е многу битно што влегуваме во една голема неизвесност, а неизвесноста на некој начин е убиствена за бизнисот затоа што не можат да планираат за шест месеци, една година…. туку планираат години однапред. Тоа може да се одрази на приливот на странски инвестиции, положбата на странските инвеститори кај нас, дијаспората итн. Имено, влегуваме во фаза во којашто конечно се става крај на глобализацијата од економска гледна точка – смета професорот Славевски, додавајќи дека глобализацијата имала поволно значење за нашата држава.

Извршната директорка на ЕОС Матрикс и претседателка на Европската бизнис асоцијација, Катерина Бошковски вели дека воведувањето на царините од страна на американската администрација ќе има значителен импакт особено кон земјите членки на ЕУ, а кај нас ефектите ќе бидат малку пролонгирани.

– Она што е можеби посимптоматично е повикот на ЕУ за еден унифициран, обединет пристап и одговор кон овие тарифи, коишто ги воведе американската економија, што можеби е сериозен предизвик за ЕУ и според мене посериозниот удар, којшто го нанесе ова воведување на тарифитите кон ЕУ. Колку ќе успее ЕУ во тоа, останува да видиме – вели Бошковска.

Додава дека она на што ние ќе треба да работиме е внатрешно реорганизирање особено во делот на днаочната и фискалната политика.

– Но, останува да видиме. Што се однесува до нашата економија, ефектите ќе бидат малке пролонгирани. Очекувам да бидат во подоцнежниот период. Но, ние мора да ги истакнеме нашите предности како економија и тука да работиме на внатрешно реорганизирање, особено во доменот на даночната и фискалната политика – подвлекува Бошковска.

Никица Мојсовска Блажевски, извршна директорка на „Macedonia2025“, смета дека воведените царини може да доведат до намалување на идните можни инвестиции од нашата дијаспора во САД.

– Споменав дека извозот не е толку голем – 110 милиони евра. Меѓутоа, секако ќе влијае врз одредени компании, не очекувам дека тоа во моментов би го намалило доаѓањето на странските инвеститори, но, би рекла дека поголем е индиректниот ефект, односно ефектот што нашите компании го имаат преку извоз на одредени производи кон ЕУ, а потоа од ЕУ кон Америка. Исто така мислам дека ќе доведе до намалување на идни можни инвестиции од САД, особено зборам за нашата дијаспора од САД, којашто се почесто почна да отвара свои компании во Македонија, коишто примарно се со цел извоз во САД – вели Мојсовска Блажевска.

Според економските експерти, државата треба да ги бара решенијата преку стартешки дијалог со САД за да се иницира преиспитување на царинската стапка и да се побара подобар третман.