М-НАВ ПРЕТВОРЕНА ВО СЕМЕЈНА ФИРМА НА ДУИ Сестрата на Османи, снаата на Груби, внукот на Буши дел од контроверзната фамилијарна мрежа 

Контроверзна мрежа на фамилијарни врски и вработувања по партиска линија во Македонската воздушна навигација (М-НАВ) се откриваат во емисијата „Код“ на ТВ Телма.  Откритијата следуваат по тврдењето на премиерот Димитар Ковачевски дека М-НАВ се трансформирала во, како што вели, „семејна фирма“, со вработени кои опфаќаат три генерации.

„Според лица вработени во М-НАВ со кого Телма разговараше дојдовме до информација дека од неодамна таму е вработена сестрата на министерот за надворешни работи Бујар Османи, снаата на првиот вицепремиер и министер за политички систем и односи меѓу заедниците Артан Груби, снаи и синот на поранешниот пратеник од ДУИ, Ејуп Алими, внук на советникот на директорот Беким Незири како и внук на министерот за земјоделство Љупчо Николовски“ – посочија од „Код“ во вечерашната емисија.

Според нивни извори, во М-НАВ е вработен и внук на заменик министерот за внатрешни работи Назим Буши. Додека пак роднините на Незири и Николовски работат како помошници контролори, во оператива е сестрата на Бујар Османи, а останатите се во администрацијата.

Османи на „Код“ им одговорил дека неговата сестра таму работи 15 години, а Николовски дека „станува збор за високостручен професионален кадар школуван во Јапонија, Кина, дипломиран на проблематиката каква што се бара на високорангиран универзитет во Словенија, со сите професионални капацитети за какви Република Северна Македонија треба да се бори да ги задржи“.

„Код“ објави и детали од седницата на Влада од 9 јануари, кога на дневен ред беше разрешувањето на менаџментот на М-НАВ, по насилниот упад во зградата на Контролната кула на Скопскиот аеродром на 4 јануари.