Лукаревска објасни како компаниите може да аплицираат за мерката 14.500 денари

На денешната прес-конференција, заедно со министерката за финансии Нина Ангеловска, директорката на УЈП, Сања Лукаревска рече дека Управата за јавни приходи го надгради системот за аплицирање и добивање на средствата за исплата на минимални плати за вработените во приватни фирми кои забележале загуби поради кризата со ковид-19, што е една од една од економските мерки на Владата.

– Владата се грижи секое вработено лице да го задржи своето работно место, па токму оваа мерка се воведува заради тоа да се спречи отпуштање на вработени – изјави директорката на УЈП.

Работодавачите што ќе побаруваат средства за исплата на плати на вработените за месеците април и мај, како што рече, веднаш по завршување на овој месец, а најдоцна до 7 мај треба да поднесат образец до УЈП преку системот е-даноци. Ова важи за исплата на платите за април, додека апликациите за мај треба да се достават до 7 јуни.

УЈП ќе го потврди барањето во рок од три дена, а откако работодавачот ќе добие потврда дека барањето е комплетно треба да внесе податоци за вработените. Фирмите, како што рече Лукаревска, истовремено може да користат и друга мерка – за субвенционирање данок на доход. По обработката на барањето за оваа мерка, УЈП го известува работодавачот за сумата што му е одобрена и го информира Генералниот секретаријат на Владата за фирмите што ги исполнуваат критериумите за исплата на средствата.

– Оваа финансиска поддршка ќе почне да се исплатува од 10 мај за платите за април, односно од 10 јуни за платите за мај. Роковите за исплата на плата остануваат непроменети, согласно законските одредби. За време на траењето на мерката, работодавачот не смее да исплаќа дивиденда, односно награди и бонуси и не смее да го намали бројот на вработени во однос на март 2020 година за повеќе од 15 проценти ако имал до 50 вработени –  рече Лукаревска.

Директорката информираша дека за фирмите со над 50 вработени процентот на можни отпуштања е ограничен на 10 проценти, а на пет проценти за компании со над 250 вработени. Исклучок од ова се пензионирани лица и починати работници.

Таа објасни и под кои услови фирмите ќе треба да ја враќаат финансиската поддршка од државата, а во која нема да имаат таква обврска.

– Па така компанија која оставарила загуба нема да ја врати финансиската поддршка. Компанија нема да ги враќа средствата доколку истите ги инвестира во еднаков или поголем износ на добиената поддршка во тренинзи на вработените, надградба на просеци, продуктивен капитал кои ќе придонесат за дополнителен раст на истата. Фирма која забележала добивка во 2020 година ќе врати лимитиран износ до 50 проценти од добивката пред оданочување – рече Лукаревска.