„ЛУФТХАНЗА“ ЈА УКИНА ЛИНИЈАТА ФРАНКФУРТ – СКОПЈЕ Сега за овој германски град може да се лета преку Виена

Германскиот авиопревозник „Луфтханза“ ја укина директната линија Франкфурт – Скопјe по повеќе од три години работење. Летови за Франкфурт, како што е соопштено, ќе се реализираат преку Виена од нејзината подружница „Аустриан ерлајнс“.

Како што првично беше објавено, линијата требаше да биде прекината на 1 јуни за еден месец и да продолжи на 1 јули, но превозникот сега ги укина сите летови до крајот на летото, како и за претстојната зимска сезона, која започнува на 25 октомври. Линијата се одржуваше десет пати неделно.

Пошироката групација „Луфтханза“ ја забрзува консолидацијата на својата европска мрежа во рамките на своите главни превозници, што се очекува да доведе до тековни прилагодувања на мрежата.

„Луфтханза“ започна со услуги помеѓу Франкфурт и Скопје во април 2023 година со 10 ротации неделно кои беа субвенционирани од владата. Договорот за субвенции траеше до 30 декември 2025 година.

Компанијата во текот на претходната зима, направи значителни намалувања на своите операции во Скопјe, намалувајќи ги фреквенциите од планираните десет неделно на само 3 неделни ротации во текот на февруари и март.

„Луфтханза“ го намали и бројот на летови до Белград и до Љубљана.

Овој развој следува по турбулентниот април за „Луфтханза“, во кој превозникот беше погоден од индустриски штрајкови, затворање на нејзината подружница „СитиЛајн“ и последователно суспендирање на бројни рути. Оттогаш компанијата објави продолжување на летовите од Минхен до дестинации во регионот погодени од затворањето на „СитиЛајн“; но, оваа недела дополнително ги намали планираните фреквенции.