Левица со кривична до експретседателот на Уставен Мурати за саботажа

Правниот тим на Левица, поднесе до скопското обивнителство кривична пријава против поранешниот уставен судија Сали Мурати, поради  сомневање за саботажа, како дело против државата и за кое е предвидена минимална казна затвор од четири години, информира Левица.

Од Левица велат дека кривичната за Мурати е бидејќи додека бил претседател на Уставниот суд, свесно и злонамерно, занемарувајќи ги своите службени должности, на прикриен и подмолен начин, одбил ажурно да постапува по иницијативата за Законот за јазици и контроверзниот т.н. „указ“ за негово прогласување – без потпис на претседателот Пендаровски иако тоа му била уставна и деловничка должност, и со тоа овозможил недозволиво одолговлекување до недоглед на постапката за оцена на уставноста и законитоста со тешко отстранливи штетни последици во праксата.

– Пријавениот се терети дека, на овој начин, сторил енормна политичко-правна штета на ниво на држава – овозможувајќи во правниот промет и сообраќај да стапи на сила т.н. „закон“ без потпис од шефот на државата, што е без преседан во нашата досегашна државно-правна историја! Со ова свое исклучително штетно дејствие, тој занемарувајќи ја својата обврска како „чувар на Уставот и законите“, дополнително причинил и значителна имотна штета која се состои во тоа што сите стотици централни и локални органи и званични јавни институции, противуставно, биле приморани да ги сменат во двојазични своите официјални табли на кои се испишани нивните називи, потоа службените печати, штембили, меморандуми, коверти, интерни инсигнии, веб-сајтови и сл. и на овој инсајдерски начин, со своето малициозно неделување и пропуштање службено дејствие, придонел да се оштети државниот буџет со апроксимативна сума од неколку милиони евра во денарска противвредност – велат од Левица.