„КУЧЕШКИОТ ТУРИЗАМ“ Е ВО ПОДЕМ Кој може да залови и да превезе неколку кучиња одеднаш – МВР бара докази за сторителите
Ова не е прв пат скопјани да бидат сведоци на т.н. „кучешки туризам“ кога улични кучиња се пренесуваат од една во друга општина или од еден во друг град и се оставаат на улиците.
Бездомните кучиња во Скопје ги има сѐ повеќе. Скопјани сведочат дека на повеќе локации низ градот кучиња се носат со товарни возила и се оставаат на улиците.
Неколку читатели на Плусинфо нè информираа дека забележале зголемен број на кучиња во близина на пешачката и велосипедска патека покрај пругата во Кисела Вода. Една од нив сподели со нас дека видела како од едно бело товарно возило, без ознаки и регистарски таблички биле пуштени неколку кучиња.
– Речиси секој ден со синчето и со кучето шетам рано наутро на ова место. Пред неколку дена забележав како од едно комбе беа пуштени 5-6 кучиња. Возачот набрзина ги истовари и веднаш побегна од местото. Искрено многу се исплашив, сакав да ги фотографирам, но не знаев што попрво да направам, дали да пазам на детето кое ми беше во количка, дали на нашето куче. Сè се случи многу бргу и немав ниту време да реагирам, а искрено гледав што побргу да се тргнам оттаму – ни раскажа скопјанката Елена.
Ова не е прв пат скопјани да бидат сведоци на т.н. „кучешки туризам“ кога бездомни кучиња се пренесуваат од една во друга општина или од еден во друг град и таму се оставаат. Плусинфо во неколку наврати пишуваше за вакви ситуации кај главната Железничката, во Карпош, во Волково… И други општини во Македонија, како на пример Куманово, Тетово, Гостивар, Кичево, Струга, информираат дека во нивните градови исто така се носат кучиња од други населени места или општини, а бидејќи повеќето од кучињата не се соодветно третирани, тие претставуваат закана за граѓаните.
Поради оваа сè почеста појава Плусинфо разговараше со директорката на ЈП „Лајка“, Радмила Пешева, како и со лица од МВР, за тоа што треба да направат скопјани доколку бидат сведоци на вакви ситуации.
– Информации дека со комбиња на различни локации некој истовара кучиња доаѓаат до нас, но никој никогаш не ни приложил доказ – фотографија, регистарски таблички и сл. за да пријавиме кај надлежните институции. Во случај некој да посведочи на таква активност, треба да го пријави комбето во МВР и во Агенцијата за храна и ветеринарство – ни посочи директорката Пешева.
Таа потенцираше дека во никој случај не станува збор за активности на јавното претпријатие кои се дел од програмата „Залови – стерилизирај-вакцинирај-врати“.
– Комбињата на ЈП „Лајка“ се обележани со нашето лого, а заловувачите на терен носат униформа со нашето лого и лесно се препознатливи. ЈП „Лајка“ го евидентира секое делување на заловувачите на терен. За секое заловено куче имаме фотографија со точни локациски координати на заловување, за после поминатиот третман кучето да се врати точно на иста локација. (Враќањето на иста локација од каде што е кучето заловено е важен сегмент од програмата, бидејќи кучињата се територијални животни и на тој начин се избегнува агресија за борба за освојување на нова територија и за извори на храна). Кучињата кои ние ги враќаме како дел од програмата „Залови – стерилизирај-вакцинирај – врати“, се видливо обележани со ушни маркици, што е доказ дека се третирани т.е. дека го поминале третманот во ЈП „Лајка“. На ушните маркици стои ознака од соодветната општина од каде што се заловени и број на маркицата, а бојата на ушната маркица ја одредува годината. За секое едно вратено куче, во ЈП „Лајка“ има досие и истото се внесува и во Ветеринарниот информативен систем – вели директорката.
Пешева додава дека при заловувањето, практично е невозможно да се фатат 20, па ни 10 кучиња од една локација, ниту пак во Скопје има толкав број нетретирани на едно место, за истите истовремено подоцна да бидат вратени.
За спречување на носењето кучиња од други градови или места, Пешева вели дека ЈП „Лајка“ не може да направи ништо, освен кучињата кои ќе бидат оставени на јавна површина да ги залови и прибере привремено во нивото прифатилиште за проверка и третман и евентуално вдомување.
– Иако, законот не содржи одредби кое таквото дејствие (дислокација на кучиња) го определуваат како противправно, доколку граѓаните забележат ваква активност, треба да ја запишат регистрациската таблица на возилото кое дислоцира кучиња или да фотографираат како доказ и случајот да го пријават во МВР и во Агенцијата за храна и ветеринарство (за транспорт на кучиња треба превозникот да има дозвола, кучињата сертификат за движење и да бидат регистрирани). Во секој случај потребни се законски измени со кои МВР би добило надлежност за да реагира при сомнеж за дислокација, бидејќи со дислоцирање и исфрлање на глутница кучиња секако се нарушува безбедноста – посочува Пешева.
Според досегашно искуство, Пешева вели дека ваквата дислокација малку е веројатно дека ја прави физичко лице, бидејќи тоа не може да залови толку многу кучиња, туку дека веројатно се работи за одредена ветеринарна амбуланта – оператор кој врши заловување по договор за општините или правни лица.
Од Министерството за внатрешни работи нè информираа дека до СВР Скопје во ноември 2023 година, од страна на претпријатието за благосостојба на животни скитници „Лајка“, до СВР Скопје е доставена пријава во која се изнесени сомневања за организирано носење со комбиња на кучиња скитници од други градови, кои се дислоцираат на подрачјето на СВР Скопје.
– Со оглед на тоа дека во пријавата се изнесени сомневања без конкретни податоци за локации, време и без регистарски таблички за возилата и податоци за лицата кои ги управуваат, не постои основ и законска надлежност за постапувања на МВР-СВР Скопје. Во таа насока, ве известуваме дека на подрачјето на СВР Скопје, во временскиот период од 01.01.2024 г., заклучно со 06.08.2024 година нема поднесена пријава за забележани товарни возила без регистарски таблички од кои се истовараат кучиња скитници на одредени локации во градот – велат од МВР за Плусинфо.
Оттаму додаваат дека во случај да се регистрира организирана дислокација на кучиња скитници, во надлежност на МВР е веднаш да се извести Агенцијата за храна и ветеринарство, која треба да испрати овластени лица на местото на настанот. Од страна на полициските службеници, согласно законските овластувања, ќе се изврши легитимирање на затекнатите лица, преглед на возилото и фотодокументирање. Потоа целокупниот материјал се доставува во Агенцијата за храна и ветеринарство, како надлежни за понатамошна постапка.
– Во насока на превенција од вакви појави, кои предизвикуваат несигурно чувство кај граѓаните потребно е граѓаните кои се сведоци на вакви појави, веднаш да се јават на 112 и да дадат што е можно повеќе податоци за настанот – порачуваат од МВР.