КРАЈ НА ДУОПОЛОТ, ЌЕ ПАДНЕ ЦЕНАТА НА ТЕЛЕФОНСКИТЕ УСЛУГИ Унгарската 4иГ поднела барање во АЕК да биде трет мобилен оператор
Министерот за транспорт, Александар Николоски вели дека мобилните оператори во земјава не направија ништо за да ги подобрат условите - не ги намалија цените, не ги подобрија услугите и не го почитуваат законот.
Унгарската компанија 4иГ и официјално изрази интерес за влез на македонскиот пазар што ќе значи крај на дуополот на двата мобилни оператори во земјава и намалување на цените за мобилни услуги, рече вечерва вицепремиерот и министер за транспорт, Александар Николоски.
– Унгарската компанија 4иГ денеска официјално поднесе документи во Агенцијата за електронски комуникации и изразија интерес за трет мобилен оператор. Сега веќе АЕК треба да ја води постапката. Се надевам дека ќе оди во правилна насока и дека конечно овој дуопол кој што го имаме на пазарот, два оператора, кои што буквално ги цицаат македонските граѓани, ќе биде разбиен и ќе може да имаме трет оператор кој што ќе понуди услуги за помалку пари – истакна вицепремиерот Николоски во „Само интервју” на Канал 5.
Тој потенцираше дека секоја друга компанија може да конкурира, а целта е да се обезбедат поевтини услуги за граѓаните.
Николоски образложи дека ваквата одлука следи откако мобилните оператори во земјава не направија ништо во изминатите четири месеци за да ги подобрат условите.
– Ниту ги намалија цените, ниту ги подобрија услугите, ниту го почитуваат законот – истакна Николоски.