Копола го преработува „Кум 3“, не му се допаѓа крајот на трилогијата ВИДЕО

Режисерот Френсис Форд Копола најави дека ќе објави нова, премонтирана верзија на „Кум 3“, која ќе биде „посоодветен заклучок“ на трилогијата за шефот на мафијата Мајкл Корлеоне.

Филмот, како што пренесува порталот НМЕ, ќе го смени и насловот во „Mario Puzo’s The Godfather, Coda: The Death of Michael Corleone“ (Кумот на Марио Пузо, Епилог: Смртта на Мајкл Корлеоне).

– Тоа е потврда за насловот што го посакувавме јас и Марио, и нашите првични намери во врска со она што на крајот испадна „Кум 3“ – рекол Копола.

Филмот е обновен во висока 4К резолуција.

– За оваа верзија на финалето, направив нов почеток и крај, и препакував некои сцени, кадри и музиката. Со овие промени и обновената слика и звук, тоа е, според мене, посоодветен заклучок за првиот и вториот дел на „Кум“ – рекол режисерот.

Новата верзија на „Кум 3“ ќе се дистрибуира во ограничен број на киносали во декември.

Копола во 2008 година објави обновени верзии на првиот и вториот дел од „Кум“, а во меѓувреме го објави и „последниот рез“ на уште еден хит – „Апокалипса денес“.