Комора за туризам: Агенциите ќе банкротираат, ако владата не ги продолжи мерките за помош
Ако не се прифатат нашите барања 5.000 луѓе ќе остаант без работа, а секторот ќе замре и нема да има можност повторно да се активира.
Туристичките агенции, превозниците во туризмот и туристичките водичи ќе банкротираат, а вработените ќе останат без работа, ако владата не ги продолжи мерките предвидени за секторот до крајот на годината и не донесе нови мерки, алармираше денеска на прес-конференција Стопанската комора за туризам.
– Ако не се прифатат нашите барања 5.000 луѓе ќе остаант без работа, а секторот ќе замре и нема да има можност повторно да се активира. За многу од нив е под знак прашалник дали ќе можат да ги хранат своите семејства – рече претседателот на Комората Емил Димитровски.
Комората, како што беше речено на прес-конференцијата, веќе подготвила девет предлог мерки кои ги доставила до Министерството за економија.
– Две од мерките се најважни за секторот. Бараме мерката за субвенционирање на платите и придонесите да продолжи до крајот на годината, со тоа што придонесите ќе се покријат со 100 отсто субвенции. Со тоа ќе се помогне на вработените во овој сектор – појасни извршната директорка Биљана Пејоска Ристеска.
Од Комората бараат парите кои агенциите ги добиваат од Фондот за туризам да бидат неповратни, а средствата да се распределуваат според обрт на промет во 2019 година според скалеста структура и со неа да се опфатат и агенциите регистрирани во јануари годинава.
Дополнително бараат туристичките компании да бидат ослободени од плаќање на ДДВ и аконтативна добивка до краJот на годината, како и одложување на плаќањето на кредитите за една година.
Стопанската комора за туризам предлага измени и во протоколот за патување во автобус со тоа што пополнетоста на автобусот да биде 70 отсто, наместо 50 отсто.
– Семејствата да можат да патуваат на седишта еден до друг. Бараме и важноста на зелениот картон да се продолжи за периодот додека превозниците не превезувале туристи. Тој картон да може да се користи во 2021 година како субвенција – рече Пејоска Ристеска.
Од Комората бараат и лиценцираните туристички водичи да бидат опфатени со посебна мерка за субвенционирање со половина плата.