Колку работни места ќе укине пандемијата на ковид-19?

Според Меѓународната организација на трудот (МОТ), пандемијата на ковид-19 се очекува да резултира со пад од 14 проценти на работното време на глобално ниво во вториот квартал од 2020 година.

Агенцијата за труд на Обединетите нации соопшти дека ова ажурирано за намалување на работното време е еквивалентно на загуба на 400 милиони работни места со полно работно време на глобално ниво во вториот квартал, засновано на стандардна 48-часовна работна недела.

Во претходниот извештај во мај, МОТ предвидуваше пад на 10,7 проценти од работното време или загуба од 305 милиони работни места, што значи дека ситуацијата се влоши во меѓувреме.

Во најновото, петто издание на мониторот „Ковид-19 и светот на работата“, МОТ истакна дека Америка е најпогодениот регион, со проценет пад на работното време од 18,3 отсто, или 70 милиони работни места со полно работно време.

За првиот квартал од оваа година, МОТ пресмета пад на работното време низ целиот свет од 5,4 проценти, што е 155 милиони работни места, споредено со четвртиот квартал од минатата година.

МОТ наведува дека неколку глобални фактори го предизвикуваат овој пад, како што се пократко работно време, привремени одмори, како и невработеноста и неактивноста.

Во извештајот на МОТ се наведени три различни сценарија за закрепнување на пазарот на труд во втората половина од годината.

Основниот модел предвидува пад на работното време од 4,9 проценти, односно загуба на 140 милиони работни места во однос на четвртиот квартал од 2019 година.

Ова сценарио претпоставува закрепнување на економската активност според постојните предвидувања, укинување на ограничувањата на работното место и закрепнување на потрошувачката и инвестициите.

Песимистичкиот модел би значел пад од 11,9 проценти во работното време или загуба на 340 милиони работни места. Оваа прогноза се заснова на можноста за втор бран на коронавирусот.

Оптимистичкиот модел значи намалување на работното време за 1,2 процент или загуба на 34 милиони работни места и ова најдобро сценарио би се случило доколку сите работни активности продолжат брзо, со создавање нови работни места и зголемена побарувачка.