КИЕВ И МОСКВА СИ ЈА ПРЕФРЛААТ ВИНАТА Инфраструктурата е оштетена, денеска неколку градови се бомбардирани
Русите пукале врз град во регионот Запорожје, додека има наводи за пукање во Суми. Од друга страна, Украинците го ракетираа Доњецк, главниот град на истоимената провинција, каде избувнал голем пожар. Во Херсон евакуацијата продолжува. Третина од енергетската инфраструкута во Украина е срамнета со земја.
Украина и Русија меѓусебно се обвинуваат за оштетување на инфраструктурата откако денеска почнаа со серија бомбардирања од двете страни.
Руските сили пукаа врз еден град во провинцијата Запорожје, изјави Кирил Тимошенко, заменик-шеф на претседателската канцеларија. Во нападот, според него, е убиено едно лице и уништени се 16 објекти од цивилната инфраструктура.
Има информации и дека „руски терористи” пукале во пограничниот регион Суми, при што едно лице загинало, а друго е рането.
Властите на Доњецк, градот што е под руска контрола, пријавиле штета на седиштето на железничката управа. Според достапните фотографии, во тешко оштетената зграда избувнал пожар, а засега нема информации за евентуално повредени лица.
Тензиите се високи и во регионот Херсон, каде што според Кирил Стремусов, функционер кој е назначен од окупаторските руски сили, украинските сили веќе петта недела ги концентрираат своите трупи.
– Напорите за евакуација се во тек, особено за луѓето кои не можат да заминат со свои сили – додаде Стремусов, кој кажа и дека засега нема промени на првите борбени линии.
Заземањето на градот и регионот Херсон повторно е клучна цел на Украина во борбата за враќање на одземените територии и бркање на агресорот.