КАКВА ЗДЕЛКА НАПРАВИ РЕЏЕПИ ЗА ГЛАСОВИТЕ НА ЛЕВИЦА Тетово не е пазар за Левица и ДУИ, порача Вреди

Јавноста е шокирана, но само Бајрам Реџепи не се засрами ниту се покаја – откако беше фатен на дело на состаноци со претставници на Левица во Тетово, партија позната по своите анти-НАТО, антизападни и антиалбански ставови, кандидатот на ДУИ/НАИ се обиде да го негира скандалот со смешни изговори, соопшти коалицијата Вреди.

„Но, фотографиите зборуваат сами за себе, Бајрам Реџепи седеше со оние кои навредуваат сè што е албанско, само за да обезбеди неколку гласови за политички спас. Наместо да се извини за овој јавен срам, Бајрам Реџепи дури и ги навреди жителите на Тетово, обвинувајќи ги дека ги продале своите гласови. Во меѓувреме, портпаролот на ДУИ, Арбер Адеми, се појавува на телевизија и ги нарекува Тетово, Чаир и Дебар маала“, соопшти Вреди.

Ова е вистинското лице на „патриотот“ на ДУИ, кој посегнува по Левица за парче власт, ова е највалканата зделка што Тетово ја видело досега –  „патриот“ кој бара помош од Левица за да собори Албанец, додава Вреди.

„Вреди јавно прашува. Дали ова е националната стратегија на ДУИ/НАИ, да бараат спас од партијата што ги навредува Албанците и Косово? Со каков морал се појавува Бајрам Реџепи пред тетовци, откако се ракуваше со антиалбанците на Апасиев? Каква зделка направи во замена за гласовите на Левица во Тетово? Тетово не е зделка, па затоа на 2 ноември тетовци ќе зборуваат со јасен глас: Да, за Билал Касами“, соопшти Вреди.