КАКВА Е УЛОГАТА НА КОВАЧЕВСКИ И ЗЕЧЕВИЌ ВО БЕГСТВОТО НА МЕМЕТИ? Прозивки од ВМРО-ДПМНЕ

Командирот на смена во затворската полиција во Идризово, во чие дежурство побегна осудениот за убиство Беким Мемети, и кој заедно со уште двајца затворски полицајци сега е во притвор под сомнение дека му помогнал на осуденикот да побегне, е близок на СДСМ и е протежиран од оваа партија, иако има сомнително професионално минато – обвини ВМРО-ДПМНЕ.

Командирот Димитријевски, тврди ВМРО-ДПМНЕ, претходно како полициски службеник е фатен на дело при поткуп, но наместо да биде избркан, тој добил повисока позиција во државната управа, како Командир на смена во Идризово.

„Командирот, во чија смена избега осудениот затвореник, е близок до Миле Зечевиќ. Во една своја објава на социјалната мрежа Фејсбук тој е сликан со Зечевиќ, а пораката под сликата е “Со шефот до крај”. Дали Зечевиќ и Ковачевски стојат зад него, и дали тие се причината поради која тој бил поставен на командирска позиција? Дали дозволеното бегство, за кое веќе потврдија и медиумите, е по налог на СДС? Ковачевски и Зечевиќ да не се кријат, поради нив, државата стана небезбедна, а во затвор се само тие кои немаат линк со власта“ – се вели во соопштението на ВМРО-ДПМНЕ.