КАДЕ Е СУДСКИОТ СОВЕТ ДА РЕАГИРА ЗА БЕГСТВОТО НА РАМАДАНИ? Пуштен беше во домашен притвор само за да може да побегне, обвинува ВМРО-ДПМНЕ

Совршено јасно е дека Блерим Рамадани е пуштен во домашен притвор од каде избега од истите судии кои со години му слугуваат и го штитат криминалот на СДСМ и ДУИ, обвини ВМРО-ДПМНЕ преку соопштение.

„Зошто не реагира Судскиот совет на ваквата одлука на судиите? Затоа ли СДСМ и ДУИ се против распуштање на Судскиот совет и реформи во судството? Да потсетиме дека ова не е прв случај да се пуштаат на слобода вакви лица. Во 2019 година на слобода е пуштен и Косовецот Томор Морина кој на Косово го пречекаа со музика, од истите судии и спрега која ја контролира СДСМ и ДУИ. Овие две партии се рак рана и извор на криминалот во ова општество и ќе има одговорност за сите кои ја попречуваат правдата“, соопшти ВМРО-ДПМНЕ.

Од СДСМ, пак, обвинуваат дека Рамадани е пуштен да побегне од МВР и од министерот Панче Тошковски.

„Додека Тошковски и МВР се обидуваат несмасно да спинуваат дека Судот е крив за бегството на Блерим Рамадани, тој веќе е на Косово. Има ли поголем доказ дека тој е намерно пуштен од МВР и Тошковски, што само за еден ден по бегството човекот е удобно дома па уште стигаат јасни пораки од Косово дека е таму? Кого се обидуваат да залажат институциите дека ова не е целосно сценарио за ослободување реализиран од МВР? Кој ќе сноси одговорност за бегството на човек баран со меѓународна потерница? СДСМ прашува до кога Тошковски ќе биде министер? Човекот шест месеци ја води институцијата МВР а безбедноста се влоши во секој сегмент. Имаме шест убиства или обиди за убиства од кои само едно е расчистено, имаме секојдневни грабежи сред бел ден без разрешница, се случува тотален хаос со пожарите додека тој е координатор на Кризниот штаб, но никој не знае што координира. Ваква неспособност не е забележана од ниеден министер досега и затоа мора итно да си оди од функцијата“, соопшти СДСМ.