ИЗВОЗОТ РАСТЕ ПОБРЗО ОД УВОЗОТ Мицкоски ги пофали резултатите, но дефицитот и натаму е над 2 милијарди евра

Извозот на македонски стоки во првите седум месеци од годинава расте побрзо од увозот, што според премиерот Христијан Мицкоски претставува позитивен сигнал за економијата.

Мицкоски денеска, одговарајќи на новинарски прашања по пуштањето во употреба на реконструираната Стара чаршија во Гевгелија, се осврна на најновите податоци за надворешнотрговската размена, при што особено ги издвојува резултатите за јули.

– За првпат по подолг период имаме ситуација во која извозот расте побрзо отколку увозот. На тој начин се намалува дефицитот во трговската размена во првите седум месеци од годината, а тоа е особено изразено во јули, кој е прв месец од третиот квартал – изјави Мицкоски.

Сепак, официјалните податоци на Државниот завод за статистика покажуваат дека, и покрај побрзиот процентуален раст на извозот, апсолутниот трговски дефицит не е намален.

Во периодот јануари–јули 2026 година, вредноста на извозот изнесува 5,10 милијарди евра, што е раст од 8,4 проценти во однос на истиот период лани. Увозот достигнал 7,20 милијарди евра, со раст од 7,8 проценти. Разликата меѓу извозот и увозот изнесува околу 2,10 милијарди евра.

Во американски долари, извозот во првите седум месеци изнесува 5,93 милијарди долари, а увозот 8,37 милијарди долари, што значи трговски дефицит од околу 2,44 милијарди долари.

Мицкоски оцени дека резултатите за јули се над очекувањата, особено кај извозот.

– Резултатите за јули се над очекувањата, особено во делот на извозот. Растот на увозот, пак, главно е последица на високите цени на нафтата и нафтените деривати на светските пазари – рече премиерот.

Тој смета дека доколку дојде до стабилизирање на цените на енергентите, разликата меѓу растот на извозот и увозот би можела да биде уште поизразена.

– Кога би се стабилизирал тој дел од пазарот, разликата би била уште поголема, а трговскиот дефицит уште помал – додаде Мицкоски.

Според Државниот завод за статистика, во првите седум месеци од годинава најголем дел од надворешната трговија Северна Македонија остварила со Германија, Велика Британија, Кина, Грција и Србија. Овие пет земји учествуваат со 49,4 проценти во вкупниот обем на надворешнотрговската размена, додека земјите од Европската Унија учествуваат со 58,7 проценти.

Најзначајни извозни производи во овој период се катализаторите со благородни метали или нивни соединенија, сетовите проводници за возила, авиони или бродови и делови за седишта. Кај увозот, меѓу најзастапените производи се платината и легурите од платинската група, нафтените масла и моторните возила за превоз на лица.

Извозот со побрз раст од увозот е позитивен сигнал за динамиката на надворешната трговија, но податоците покажуваат дека земјата сè уште има значителен негативен трговски биланс.