ИВАНОВСКА НЕ ГИ ДАВА ГЛАСОВИТЕ НА ДРУГ КАНДИДАТ Граѓаните сами да одлучат кому ќе го дадат својот глас

Нема да ги повикувам граѓаните да гласаат за еден или за друг кандидат, бидејќи секој граѓанин си е здраворазумен, има право на гласање и има одговорност кому ќе го даде својот глас, порача кандидатката за градоначалничка на Општина Центар, Билјана Ивановска, за која изборната трка заврши во првиот круг, а освои 4.465 гласа.

– Голем број граѓани препознаа вредности и без особени кампањи, затоа што тоа се свесни граѓани кои наместо секојдневно да негодуваат за проблеми, преземаат акција за промени, преземаат одговорност за својот живот… Кој и да победи, доколку вистински се залага да го заштити јавниот интерес, треба да носи одлуки во полза на сите и да го заштити уставно загарантираното право за здрава животна средина и активното учество на граѓаните во креирањето и донесувањето на одлуките – рече Ивановска прес-конференција заедно со избраните советници од граѓанските иницијативи обединети во платформата „Независни заедно“.

Охрабрува фактот, вели таа, што Центар има критичка маса која што не размислува по партиска шема, а граѓаните се свесни дека промените треба сами да ги направат.

– Укажуваме дека е неопходно да се ревидираат, изменат и дополнат Деталните урбанистички планови, кои не се во согласност со Генералниот урбанистички план. Да не се издаваат дозволи за градба врз основа на Детални урбанистички планови, чии параметри, на пример густина на население, се поголеми од предвидените во Генералниот план. Издадените дозволи да бидат јавно објавени на мапата која што „Шанса за Центар“ доброволно ја направи и ќе ја стави на располагање на Општината, која што ќе треба само да ја одржува. Ние направивме мапа и во моментот има над 150 градби во општина Центар – посочи Ивановска.

– Нашите советници ќе делуваат конструктивно, ќе соработуваат за сите проекти од интерес на граѓаните, но ќе бидат и гласни критичари за сите сомнителни одлуки, нагласи Ивановска.

Носителката на советничката листа на Град Скопје од „Независни заедно“, Јана Белчева – Андреевска, најави дека платформата ќе продолжи со собирање потписи за нејзина регистрација како граѓанско-политичко здружение.

– Поради нееднаквите услови со кои се соочивме во текот на изборниот процес, поради сите сопки и препреки во последен момент кои што се изнајдоа за учество на граѓаните активно да бидат чинители и креатори на политиката и да учествуваат како независни кандидати и независни листи, поради сета демонизација на противници и поради намалување на демократијата во државата, ние одлучуваме понатаму да продолжиме со собирање на потписи и со регистрирање на граѓанско-политичката платформа „Независни заедно“ – изјави Белчева – Андреевска.

Таа ги повика сите независни групи низ земјата да се приклучат кон иницијативата.