„ИНДИЈА И ЈАПОНИЈА ЌЕ ГО ОБЛИКУВААТ АЗИСКИОТ ВЕК НА ПРОСПЕРИТЕТ“ Индискиот премиер Моди во Токио по инвестиции и соработка
Посетата на Јапонија е дел од поширока турнеја на Моди, кој потоа ќе отпатува во Кина на самитот на Шангајската организација за соработка, на кој ќе присуствуваат и кинескиот претседател Си Џинпинг и рускиот лидер Владимир Путин.
Индија и Јапонија ќе го обликуваат азискиот век на стабилност, раст и на просперитет, изјави денеска индискиот премиер Нарендра Моди, за време на посетата на Токио, чија цел е зајакнување на безбедносната соработка и обезбедување нови јапонски инвестиции во Индија.
– Партнерството меѓу Индија и Јапонија е стратешко и разумно. Водени од економската логика, ги трансформиравме нашите заеднички интереси во заеднички просперитет – рече Моди на економски форум.
Тој оцени дека Индија е „отскочна штица“ за јапонските компании кон глобалниот Југ.
Според медиумите, се очекува Токио да најави инвестиции во Индија вредни 68 милијарди долари.
Посетата на Јапонија е дел од поширока турнеја на Моди, кој потоа ќе отпатува во Кина на самитот на Шангајската организација за соработка. На самитот ќе присуствуваат кинескиот претседател Си Џинпинг и рускиот лидер Владимир Путин. Тоа ќе биде прва посета на Моди на Кина од 2018 година.