ИМАМЕ ПЛАН И СТРАТЕГИЈА ЗА ПРЕДВРЕМЕНИ ИЗБОРИ Мицкоски порача: бидете трпеливи, ќе видите
Ние како опозиција имаме свои алатки и методи институционално и вонинституционално, да се бориме за тоа што мислиме дека народот го очекува од нас, и да бидеме на страната на народот, рече Мицкоски.
Oпозицијата има план и стратегија и ќе ги искористи сите институционални и вонинституционални методи и алатки да дојде до предвремени парламентарни избори што побргу, рече претседателот на ВМРО-ДПМНЕ, Христијан Мицкоски, при денешната посета на Тетово одговарајќи на новинарско прашање во однос на тоа дали ќе го радикализираат опозицискиот фронт и како ќе дојдат до избори, кога власта вели дека нема да има избори до 2024 година
– Па јас не очекувам дека овие кои што се возат со лимузини од пола милион евра, кои што газат дебели црвени персиски килими во владините кабинети, и фино се залегнати во кожни фотелји, додека народот гладува а младите се селат од државата и луѓе умираат по болници или горат живи, како што беше случајот овде во модуларната болница во Тетово, дека ќе заминат. Нормално е дека нема да заминат. Нормално дека ќе сакаат до последно да го цицаат народот и да живеат на маката на народот. Ако мислите дека тие сами ќе заминат – нема да заминат, еве јас ќе ви кажам, не треба тие да ви кажат. Но затоа ние како опозиција имаме свои алатки и методи институционално и вонинституционално, да се бориме за тоа што мислиме дека народот го очекува од нас, и да бидеме на страната на народот. Да не ни се повторува да ни горат луѓе како модуларната болница овде, да не ни се повторува „БЕСА Травел“ како што беше случајот во Бугарија и тн. Можам да ви редам уште многу такви примери – нагласи Мицкоски.
Претседателот Мицкоски нагласи дека имаат план и стратегија како опозиција за што побргу да се издејствуваат предвремени парламентарни избори.
– Нормално дека имаме план, јас сум сериозен човек и секогаш во животот ги правам работите со план. Бидете трпеливи, ќе видите – истакна Мицкоски.
Тој го повика претседателот на Собранието Талат Џафери да се охрабри и да ја свика Комисијата за избори и именувања, како што тоа го прави и со останатите комисии, на која треба да се изберат уставни судии.
– Ако зборуваме за Комисијата за избори и именување во рамките на Парламентот, таа си има пратеници. Јас колку што имам информации, а последно од денеска, а тука е и еден од тие 120 пратеника, Парламентот има 120 пратеници, не е распуштен, нема исчезнати пратеници. Имаше еден, па го најдоа, јас како што знам. Така што и таа комисија има доволен број пратеници, треба само да се охрабри спикерот на Парламентот да ја закаже и таа комисија да си заседава. Сега, доколку тие сакаат да партизираат уставни судии, по партиски декрети да се ставаат таму, доколку сакаат членови на регулаторни тела да бидат по партиски декрети, простете, но јас нема да се сложам и ќе направам се што е во моја моќ тоа да не го дозволам. Така што, го охрабрувам спикерот Талат Џафери да ја закаже таа седница, како што тоа го прави и со останатите комисии во рамките на Парламентот. А, верувајте ми Парламентот е комплетен, бар сега за сега, со овие 120 пратеника во него – истакна Мицкоски.