ХОДНИЦИТЕ НА ПЕНТАГОН СТАНАА КОНТРОЛИРАНА ЗОНА ЗА МЕДИУМИТЕ Новинарите мора да бидат придружувани и да потпишат документ за заштита на чувствителни информации
Овој потег претставува уште една мерка од страна на администрацијата на претседателот на САД, Доналд Трамп, насочена кон ограничување на медиумската слобода. Претходно беа отстранети новинарите од работните простории и беше затворена салата за прес-конференции. Иако формално не е воведена целосна забрана за пристап, новите ограничувања сериозно го намалуваат директниот контакт меѓу новинарите и челниците на Министерството за одбрана.
Шефот на Пентагон, Пит Хегсет, воведе нови ограничувања за движењето на новинарите во зградата на американското Министерство за одбрана и побара новинарите да имаат официјално одобрение и придружба кога се наоѓаат во ходниците, каде што е неговиот кабинет.
Според новите правила, новинарите треба да бидат придружувани и при посета на канцелариите на службата за односи со јавноста и на другите воени оддели. Тие мора да потпишат и документ за заштита на „чувствителни информации“, што критичарите го сметаат за можен изговор за цензура на новинарските извештаи.
Ова е уште еден од низата потези на администрацијата на претседателот на САД, Доналд Трамп, за ограничување на медиумите, како иселување на дописниците од просториите за работа и како затворање на собата за прес-конференции. Иако пристапот не е целосно забранет, новите мерки значително го ограничуваат контактот меѓу медиумите и раководството на Министерството.
Меморандумот ги оправдува мерките со „ажурирани безбедносни процедури“ за намален ризик од „ненамерни откривања“. Новинарите ќе добијат нови пропусници со јасно обележје „ПРЕС“ (PRESS).
Новите правила се воведуваат по скандалот со користењето на апликацијата Сигнал од страна на Хегсет и од членови на кабинетот на претседателот Трамп, за чувствителни разговори за воздушните напади во Јемен. Јавноста дозна за ова кога групата по грешка додала новинар на изданието Атлантик. Генералниот инспектор на Пентагон и понатаму го истражува случајот.
Истовремено, аналитичарите предупредуваат дека Пентагон станува една од најнетранспарентните институции во администрацијата на Трамп, со сè поголеми рестрикции за медиумите.