Груби: Ништо не ни пречи во Резолуцијата, ја поддржуваме, само бараме да биде усогласена со сите партии
Бараме само текстот да биде усогласен со сите парламентарни партии, што е претходна пракса при усвојување на вакви Резолуции и да не претставува дополнителна пречка во билатералниот спор, порача вицепремиерот Артан Груби.
Првиот вицепремиер Артан Груби за Резолуцијата предложена од ВМРО-ДПМНЕ, а со која се утврдуваат црвените линии за идентитетските прашања во спорот со Бугарија, вели дека нема ништо што им пречи во предложениот документ, освен забелешката дека инсистираат тој да биде донесен со консензус на сите партии.
Резолуцијата досега доби поддршка од СДСМ, Демократски сојуз, ДОМ и ЛДП, додека опозициските Алијанса за Албанците и Алтернатива засега се воздржани.
– Ништо не ни пречи, ја поддржуваме. ДУИ веќе 20 години ги застапува интересите на Албанците, Македонците и на сите граѓани и затоа денес сме во НАТО и на чекор до ЕУ. Бараме само текстот да биде усогласен со сите парламентарни партии, што е претходна пракса при усвојување на вакви Резолуции и да не претставува дополнителна пречка во билатералниот спор. Ние во неколку наврати истакнавме дека идентитетот, јазикот, културата и историјата се неспорни и не можат да бидат дел од спор во 21 век – вели Груби за Плусинфо.
Но доколку ДУИ, како што изјави Груби, ја поддржува Резолуцијата, нејасно е зошто неговот сопартиец, министерот за надворешни рабти Бујар Османи во интервју за „Утрински брифинг“ вели дека целиот процес треба да почне од нула, затоа што, како што посочува, се плаши дека може од државна со ваква Резолуција да преминеме во етничка позиција.
– Ако треба да се донесе некаква резолуција тоа треба да биде производ од сите, а не наметната од некоја политичка партија. ДУИ е на ставот дека овој процес треба да почне од нула, да седнат политичките партии консензуално, а не да биде наметната од една партија. Како што напоменав, се плашам дека може од државна со ваква резолуција да преминеме во етничка позиција – рече Османи.
Тој вели дека ако заради некои политички, партиски амбиции, овој државен консензус којшто го постигнавме се претвори повторно во етничко прашање, тоа е најголемата штета што може да ја направи.
Дилемата е дали ѝ пречи на ДУИ нешто во текстот на Резолуцијата и ако е така, што би менувале? Но, од партијата не сакаат да коментираат.
Дека можеби не станува збор само за консензуално усоглаусвање на Резолуцијата упатува и острата забелешка на лидерот на ВМРО-ДПМНЕ, Христијан Мицкоски, за весникот „Вечер“. Мицкоски ѝ порача на партијата на Али Ахмети да ги надмине своите милитантни однесувања и барем еднаш да застане зад интересот на нивните сограѓани.
– Очекувам ДУИ да ги надмине своите милитантни однесувања и барем еднаш да застане зад интересот на нивните сограѓани – Македонците како мнозинска заедница. И наместо да ги гледаме нашите лични интереси и интересите на соседите од другите држави, да ги гледаме интересите на соседите тука внатре, во нашата Македонија, тоа се интересите на мнозинскиот, македонскиот народ – вели Мицкоски.
Од ВМРО-ДПМНЕ велат дека Реолуцијата е испратена до сите пратеници и дека деновиве имале интензивни средби со претставници на партии со цел да се постигне консензус за истата. Од таму велат дека не станува збор за авторски текст на партијата, туку дека тој е темелен на дефиниции и позиции на општествени и научни авторитети од МАНУ, УКИМ и МПЦ-ОА. Дека Резолуцијата е од државен и национален интерес и е ретка можност да се постигне општествено обединување.
Од ВМРО-ДПМНЕ велат дека со понудата на Резолуцијата до пратениците покажале дека се отворени за сугестии. Од таму велат дека Резолуцијата деновиве ќе ја достават до Собранието и дека консензус ќе бараат на самата собраниска седница.
Од друга страна, опзициската Алјанса за Албанците сѐ уште не се изјасни дали ќе ја поддржи Резолуцијата. Нивниот коалициски паретнер, пак, Алтернатива, очекува Собранието да усвои резулуција за албанскиот јазик.
Како што изјави претседателот на Алтернатива, Африм Гаши за „Дојче веле“, очекува македонските партии да предложат и резолуција со која ќе се промени формулацијата за албанскиот јазик во Уставот кој е дефиниран само како „јазик кој го зборуваат најмалку 20 отсто од граѓаните, а кои не се мнозинство“. Тој на Македонците и на нивните политички претставници им порача:
– Не правете им го на другите тоа што не сакате вам да ви го прават.
По ова, неизвесно е дали Алтернатива ова ќе го постави како услов за консензус за Резолуцијата и дали од албанскиот блок ќе бидат испорачани нови барања.