ГРАДОНАЧАЛНИК ИСТЕПАЛ ПОЛИЦАЕЦ!? Случајот се крие и забошотува, тврди ВМРО-ДПМНЕ
Ги охрабруваме сите присутни на настанот да посведочат за истиот, воедно го охрабруваме и оштетениот во настанот да ја води постапката до крај – повикува ВМРО-ДПМНЕ.
Градоначалникот на Крива Паланка Сашко Митовски на 14 јануари по полноќ физички нападнал полициски службеник, кој во тој момент не бил на должност – тврди ВМРО-ДПМНЕ врз основа на изјави на граѓани. Партијата тврди дека во билтенот на МВР тој напад е регистриран како Напад од Н.Н. (непознат) сторител, иако самиот нападнат, а и кривопаланчани добро знаат за кого станува збор.
ВМРО-ДПМНЕ бара ОВР ПС Крива Паланка да не го забошотува случајот.
„Шокирани сме од информациите кои деновиве кружат помеѓу кривопаланчани, според кои нешто по полноќ на 14.01.2023 година градоначалникот Сашко Митовски физички нападнал наш сограѓанин без било каква причина. Дополнително на тоа информациите говорат дека настанот во билтенот на МВР бил заведен како Напад од Н.Н. сторител (непознат сторител) како да сме паднати од Марс, а граѓанинот не знае кој го нападнал. Јавно прашуваме до ОВР ПС Крива Паланка дали ваквите срамни и понижувачки информации се вистинити, имајќи предвид што нападнатото лице е полициски службеник, кој во периодот кога е нападнат од градоначалникот не бил на службена должност? Ги охрабруваме сите присутни на настанот да посведочат за истиот, воедно го охрабруваме и оштетениот во настанот да ја води постапката до крај.
Насилието и теророт врз граѓаните од страна на градоначалникот Сашко Митовски мора да запре, за што јавно го повикуваме, доколку имал храброст да нападне граѓанин, да биде храбар и да се соочи со сите последици кои произлегуваат од настанот, да не се заканува и да бара сведоците на настанот да молчат, да не се заканува на оние кои јавно пишуваат за настанот на социјалните мрежи и да не вовлекува други службени лица од Полициската станица во Крива Паланка да прават кривични дела за што со сигурност по промената на власта на престојните предвремени парламентарни избори ќе одговараат“ – пишува ВМРО-ДПМНЕ.
Ако се потврдат нивните информации, партијата најавува дека ќе бара неоптповиклива оставка
од Митовски, зашто, како што вели, „Крива Паланка не заслужува силеџија-каубоец за градоначалник“.