ГОДИНАВА ЌЕ СЕ ОБИДЕМЕ ДА ДОЈДЕМЕ ДО 61 ПРАТЕНИК Мицкоски жали што лани не успеале со предлогот за предвремени избори

Мојата порака за оваа година е да бидеме единствени, да се обединиме и да го победиме злото, вели претседателот на ВМРО-ДПМНЕ Христијан Мицкоски во утринската програма на Македонската телевизија.

– Јас сум задоволен, иако секогаш може подобро и мораме да се трудиме да биде секогаш подобро. На политички план сум задвоолен. Покажавме дека не се сите исти, дека една плејада нови градоначаници на ВМРО-ДПМНЕ од различни возрасти, некои помлади, некои повозрасни, од различни професии успеаја да покажат дека не сме сите исти. Навистина се реализираа многу проекти без ниту еден скандал, што е многу важно. За Македонија е тоа многу важно без ниту еден коруптивен скандал, ниту пак обвинувања за сторен криминал и е многу важно бидејќи тоа е основата за сѐ, од тука почнуваат сите проблеми – рече Мицкоски.

Тој потенцираше дека иако годинава не успеале да издејствуваат предвремени парламентарни избори, оваа година ќе сторат сѐ што е во нивна моќ да се одржат предвремени избори, и наместо да има влада и премиер избрани од неколкумина, да се избере нова влада и премиер од народот.

– Можеби една работа недостасуваше а тоа е да успееме некако да дојдеме до предвремени парламентарни избори. Но, за жал, немаме свесни 61 глас во рамки на парламентот кои што ќе го остават својот личен и партиски интерес на страна, и ќе го гледаат државниот интерес на народот во Македонија, без разлика дали се Македонци, Албанци, Турци, Роми, Срби или други, треба да го гледаат интересот на народот и државата. За жал, минатата година, 61 не успеавме да најдеме, се надеваме дека оваа година ќе дојдеме до 61 кои ќе го распуштат парламентот и наместо избран од неколкумина премиер, ќе имаат Влада и премиер кои ќе бидат избрани од народот и ќе имаат премиер и влада кои што ќе бидат народни. Ќе сториме сѐ што е во наша моќ тоа да го направиме – дециден е тој.