ФИНСКА ЌЕ РАЗМИСЛИ ДА ВЛЕЗЕ БЕЗ ШВЕДСКА Финското МНР размислува за самостоен влез во НАТО

Финска мора да размисли за влез во НАТО без Шведска, изјави во вторникот нејзиниот министер за надворешни работи. Изјавата доаѓа откако Турција ја отфрли можноста да даде зелено светло за понудата на Шведска, по протестот со палење на Куранот, јавува Еуроњуз.

– Заедничкото членство на двете нордиски земји останува „првата опција“, но „очигледно треба да ја процениме ситуацијата, ако нешто се случило, што значи дека долгорочно Шведска повеќе не може да оди напред – рече Пека Хаависто.

Сепак, тој рече дека е „прерано да се каже“.

Во мај, и Шведска и Финска се пријавија за приклучување кон западната воена алијанса, по руската инвазија на Украина.

Анкара досега ги блокираше нивните понуди, во обид да ги натера Хелсинки и Стокхолм да исполнат одредени политички барања, како што е екстрадиција на критичарите на турскиот претседател Реџеп Таип Ердоган и курдските групи за кои тврди дека се „терористи“.

Во понеделникот, Ердоган рече дека Шведска повеќе не може да смета на поддршката од неговата земја, по протестот со палење Куран во шведскиот главен град што предизвика протести во Турција и во муслиманскиот свет.

Турција го одложи трилатералниот состанок со Шведска и Финска, закажан за февруари, по протестите што викендот се одржаа во Стокхолм, во кои беше запален Куранот, што предизвика осуда од Анкара, објави денеска државната телевизија ТРТ.

Средбата што требаше да се одржи во февруари во Брисел е одложена на барање на Анкара, објави ТРТ, повикувајќи се на турски дипломатски извори. Портпаролот на турскиот претседател Реџеп Таип Ердоган на почетокот на месецов изјави дека на тој состанок ќе учествува и генералниот секретар на НАТО, Јенс Столтенберг.

Извор од турското претседателство изјави дека Турција не ја откажала, туку ја одложила средбата, без да прецизира кога.