ФИЛИПЧЕ БАРА НАЧИН ДА СЕ ФАКТОРИЗИРА КАКО ЛИДЕР НА ОПОЗИЦИЈАТА Ниту бара, ниту нуди нешто конкретно за лидерската средба

Трагедијата во Кочани треба да биде поука, време е да се направи целосен ресет во државата, вели координаторот на пратеничката група на ВМРО-ДПМНЕ, Никола Мицевски.

– Се интервенира во Законот за прекршоците против јавниот ред и мир. Конкретно, се утврдува дека не е дозволена употребата на пиротехничките средства во објекти и простории од затворен тип. Меѓутоа, не се само овие измени. Ќе се промени Законот за експлозивни материи за цивилна употреба – рече Мицевски во гостување на МРТВ.

Во врска со анкетните комисии Мицевски вели дека СДСМ наметнува некои теми во јавноста, но предлог до Собранието сè уште нема. За иницијативата што ја поднесе Европскиот фронт вели дека е противуставна затоа што нема потписи од 20 пратеници.

– Она што го поднеле Европскиот фронт како барање во Собранието е надвор од уставните норми. Односно, за формирање на анкетна комисија се потребни 20 потписи од пратеници, а тие во моментот имаат 16 потписи. И самиот наслов на таа комисија, за добивање на информација за состојбите е малку загрижувачка, имајќи во предвид дека Собранието нема, или комисијата сама по себе нема истражна функција. Она што треба Собранието да го направи е да дојде до политичките заклучоци врз основа на она што се случувало за одредена состојба, случај или процес – рече Мицевски.

Тој истакна дека ова парламентарно мнозинство е различно од минатото и дека се отворени да зборуваат, доколку има некаков предлог согласно Уставот и законите, за модуларната болница, за онкологија, Беса транс, Дурмо турс, за јавните набавки во Министерството за здравство и за сите отворени и неразрешени ситуации во минатото.

– Во ситуација кога имаме активна истражна дејност на институциите, негативно е ние да излегуваме и политички, од говорница каде што сме заштитени по правото на збор, да влијаеме или не дај Боже, некако го поништиме процесот на истражни дејствија и постапките кои што ги водат институциите. Сметам дека институциите во овој случај, односно во трагедијата во Кочани, реагираа брзо. Очигледно е дека институциите беа организирани и дека успеаја да изреагираат, да обезбедат одредени состојби во моментот кој што се случуваат и дека понатаму ќе нè очекува еден транспарентен процес во којшто ќе дојдеме до одговори на сите прашања – потенцираше Мицевски.

Мицевски вели дека и по недела дена од разговорите и отворањето на темата сè уште нема официјално барање за лидерска средба од Венко Филипче.

– Ирелевантно е местото на кое што би се одржало нешто такво. Она што е повеќе отворено како прашање е дека ние од претседателот на Социјалдемократскиот сојуз досега немаме слушнато нешто конкретно и отворено да каже по однос на ова што е најавено, односно таа лидерска средба за која што се зборува во медиумите. Несериозно е сите ставови да ги разбираме од медиумите. Она што јас го воочувам како факт е дека претседателот на Социјалдемократскиот сојуз, Филипче бара начин да се факторизира како политичар, односно како лидер на опозициона партија. По мене, ваквото барање, во суштина, не е ништо и не испорачува никакви резултати, туку единствена можност е факторизација на Венко Филипче и вовлекување на ВМРО-ДПМНЕ или владејачката коалиција во нешто во што нема потреба во моментот да се влегува – рече Мицевски.

Со почит,