Еве како да се подготвиме за борба со ковид-19 во наредниот период

Бројките се јасни, а и наредниот период на грипови и настинки како и намалувањето на медицинскиот персонал ќе доведе до одредени промени, но сите заедно можеме да се спротивставиме на опаката болештина. Во наредниот период е клучно:

– Да се измислат нови чаленџи за време на карантин пошто старите поминаа еднаш;

– Барем еден од семејството да научи како се употребува брашно, а да не е за сликање демек кокаин;

– Набавка на квалитетна тоалетна хартија и наоѓање на курс за оригами. Се прави само од неискористена хартија;

– Книги за читање и една за да ја израмниш масата со покуса ногарка;

– Затапување на ножевите и криење на остри предмети доколку во тие моменти дојде до ескалација на семејните односи;

– Пишување тестамент, пак;

– Позајмување на бормашината од комшијата и нејзина дислокација на сигурно место додека не се среди состојбата;

– Избор на репертоар на песни, на ниво на куќен совет, кои ќе се пеат од балкон, со тоаншто треба да се внимава и на соседите кои немаат голем распон на вокал;

– Избегнување на конфликтни теми во кругот на семејството, како што се: економската состојба, политичката состојба, косата на Османи (фејк или не), на кој начин Мицкоски правеше толку танки црти на брадата, темата “опшесво” и лични теми кои варираат од “Кога ќе се жениш/мажиш” до “Алал му вера на Гоце син му во РЕК влезе, не ко тебе низ врата не можиш трезен да влезиш”;

– Забрана за грчење над 55 децибели или изолација на членот што го прави тоа од другите здрави членови.

Со почит

Моџо Килингтон

Дописен член на СЗО и на шаховскиот клуб за пензионери од Пробиштип “Арпад Ело”

 

(ФБ статус на авторот)