📽 НИ ТРПЕЗА, НИ ДОСТОИНСТВЕН ТОАЛЕТ На механичари и возачи од ЈСП „Скопје“ им дојде преку глава од нехигиената

Ѕидови што се распаѓаат, дотраена инсталација, запуштени санитарии се дел од секојдневната слика на вработените во ЈСП Скопје кои ги користат службените тоалети и дополнителните простории во базните станици во „Ѓорче Петров“ и во „Автокоманда“.

Црн наместо бел мијалник, расфрлани пластични шишиња по подот. Поцрнети полски тоалети. Во помошните простории крововите протекуваат, дел од прозорците се без стакла. Ваквата атмосфера трае со години и никој ништо не презема за да се подобрат условите за престој на возачите, механичарите и другите вработени во ЈСП.

Плусинфо разговараше со неколку вработени во овие бази, кои ни испратија и фотографии и видеоснимки.

– Погледнете ги тоалетите, ако може така да се наречат, и помошните простории што ние како вработени ги користиме во гаражата во „Ѓорче Петров“. Сигурен сум дека е слично или исто и во „Автокоманда“. Ниту е искречено со години, ниту има назначено хигиеничар да ги зачисти „ќенефите“. Тотална катастрофа е ова што се случува во претпријатието – вели возач кој сакаше да остане анонимен, бидејќи тврди дека дисциплинската комисија во ЈСП постојано ги казнува вработените од 10 до 30 отсто од платата од 3 до 6 месеци.

Нашиот соговорник вели дека е жално тоа што се случува во ЈСП „Скопје“. Тој повеќе од 20 години работи во претпријатието во кое работел и неговиот татко. Размислува да ја напушти компанијата, иако не го сака тоа.

– Од Коце Трајановски, па потоа и Петре Шилегов, а сега и Данела Арсовска, јас и колегите се надевавме дека конечно ќе дојдат да ги подобрат работите во ЈСП „Скопје“. Верувавме дека нешто ќе успее и ќе се подобри, но состојбата во претпријатието станува сѐ полоша. Имаме семејства кои се бориме да ги прехраниме. Нормално е сите кои се незадоволни по децениска работа да си заминат од претпријатието – вели тој.

За лошата состојба во тоалетите и помошните простории ни посведочи и друг вработен во гаражата во „Автокоманда“.

– Тешко е да работиш во гаража, а да немаш каде да одиш по нужда. Тешко е да работиш, а да немаш каде да седнеш и да ручаш како човек. Ситуацијата е ваква веќе долго време. Досега издржуваме некако, но верувајте веќе не се може вака. Никакви услови за работа, платата не се зголемува, казни „летаат“ од сите страни. Јас и сè повеќе колеги размислуваме да напуштиме, подобро ќе возиме во странство, во меѓуградски или меѓународен сообраќај, па дури и како дистрибутери со комбиња за плати речиси двојно поголеми од нашите – додаде тој.

Плусинфо во неколку наврати пишуваше дека стотина возачи планираат да си заминат од Јавното сообраќајно претпријатие.