ЕЛМАС ГО РЕШИ ДЕРБИТО НА САН СИРО Големиот Милан на колена пред македонскиот репрезентативец

Елиф Елмас го одлучи дербито на „Сан Сиро“ во кое Наполи успеа да слави над Милан (0-1), во рамките на 18. коло од Серија А.

Гостите брзо го отворија резултатот, по првата мешаница пред противничкиот гол. Македонскиот фудбалер скокна највисоко по центаршутот од корнер на Пјотр Зјелински и со глава го матира Мајк Миањан.

Тимот на Лучијано Спалети имаше за нијанса повеќе од играта во првиот дел. Меѓутоа и „росонерите“ имаа свои моменти. Златан Ибрахимовиќ се закани со глава, а Алесандро Флоренци биеше непрецизно од далечина. На пауза се замина со минимална предност за гостинската екипа, која себично го чуваше водството.

Милан направи неколку измени во второто полувреме. Шанса доби и Оливие Жиру, но најголемата шанса ја имаше Жуниор Месиас. Бразилскиот интернационалец шутираше за малку над пречката и за малку не го израдува својот тим. Наполи одлично се бранеше и на крај за малку не испушти чиста победа. Френк Кеси се најде во одлична позиција и ја затресе гостинската мрежа, но ВАР-технологијата спречи радост на трибините во 90. минута.

За Елмас ова е втор погодок во италијанското првенство оваа сезона, по реализацијата на домашен терен против Венеција. Наполи се искачи на второто место со ист број бодови како и Милан, но четири помалку во однос на лидерот Интер.