ЌЕ СЕ ОДЛОЖИ СРЕДБАТА НОРВЕШКА-АНГЛИЈА? Четвртфиналето под закана од сахарска прашина и 43 степени
Екстремно високите температури, сахарската прашина и најавените грмежи создаваат сериозни проблеми во Мајами, каде што треба да се одигра четвртфиналето на Светското првенство.
Четвртфиналниот натпревар на Светското првенство меѓу Норвешка и Англија, кој е закажан за в сабота во Мајами, би можел да биде одложен поради опасните временски услови што го зафатија јужниот дел на американската сојузна држава Флорида.
Властите издадоа предупредување поради екстремно високите температури, а британскиот весник „The Sun“ објави дека постои реална можност натпреварот да не започне во предвидениот термин.
Според информациите од САД, веќе во петок субјективното чувство на температура би можело да достигне дури 43 Целзиусови степени, што претставува сериозен ризик за здравјето на играчите, навивачите и службените лица.
Дополнителен проблем претставува и огромниот облак сахарска прашина што пристигна над Флорида. Иако најголемиот дел од прашината се наоѓа на околу еден и пол километар над земјата, метеоролозите предупредуваат дека таа може значително да го влоши квалитетот на воздухот.
По екстремно топлата сабота, се очекува да се зголеми и влажноста на воздухот, што ќе создаде услови за силни грмежи и невреме.
Токму најавените грмотевични бури се главната причина поради која постојат сомнежи дали натпреварот меѓу Англија и Норвешка воопшто ќе започне според предвидениот распоред.
Организаторите засега не донеле официјална одлука за евентуално одложување, но внимателно ја следат временската прогноза и се подготвени да реагираат доколку временските услови претставуваат опасност за безбедно одигрување на натпреварот.