ЌЕ ИМ ГО РАСТУРИ ЛИ БУГАРСКОТО ВЕТО ПАЗАРЛАКОТ НА ЗАЕВ И ГАШИ? Госпоѓа Реџепи погрешно го разбрала Макрон
Потребни се предвремени парламентарни избори кои би се организирале во што е можно поскоро време. На тие избори народот ќе може да каже што мисли за непринципиелните коалиции коишто се создаваат на лукративна основа, вели Бојан Стојаноски, пратеник од редовите на ВМРО-ДПМНЕ.
Падна ли во вода целиот пазарлак што го направи премиерот Зоран Заев со лидерот на Алтернатива, Африм Гаши, со цел „формирање парламентарно мнозинство за сигурно да се обезбеди датум за преговори со Европската Унија во декември годинава“?
Ова прашање се поставува откако бугарската преодна влада завчера гласно и јасно ни даде до знаење дека малку „ште исчакаме“ за отворање пат кој би нè однел до зачленување во европското семејство, односно дека не постојат теоретски шанси нашиот источен сосед да нè израдува со повлекување на ветото.
Ваквата ситуација со сигурност ќе ја размрда домашната политичка сцена, особено поради тоа што опозицискиот блок сега ги има сите потребни адути за да изврши „инвазија“ врз новото парламентарно мнозинство и да се обиде да ја сруши власта преку предвремени парламентарни избори.
Добивањето датум во декември се користи само како изговор за да се прикрие вистината дека партиите од владината коалиција се борат единствено за гола власт.
Пратеникот на ВМРО-ДПМНЕ, Бојан Стојаноски, во изјава за Плусинфо вели дека новото бугарско вето претставува уште една потврда за тоа дека договорот што го направи власта со Алтернатива бил единствено за поделба на ресорите, а како што вели, потребни се брзи предвремени парламентарни избори на коишто народот ќе каже што мисли за непринципиелните коалиции коишто се создаваат на лукративна основа.
– Нашиот став уште од почеток беше принципиелен и ние се надевавме дека на 14 декември условно ќе добиеме датум за почеток на преговорите со Европската Унија и не правевме апсолутно ништо со што би го спречиле процесот за добивање датум. Но, суштината е во тоа што со непринципиелни и асиметрични договори, Заев практично им даде можност на политичарите од Бугарија да нè кочат во нашиот евроатлантски процес, односно им даде можност да нè оспоруваат и да нè уценуваат за нашиот пат кон ЕУ поради дневнополитички теми. А од аспект на тоа што пратеникот Кастриот Реџепи од Беса и лидерот на Алтернатива, Африм Гаши, направија договори со власта коишто се базираат единствено на добивањето датум во декември, сосема е извесно дека нивната главна цел беше како да ги поделат ресорите и ништо повеќе од тоа. Нелогично е да се залагате една политичка партија да излезе од власта и така да говорите пред граѓаните за да добиете гласови на изборите, а веднаш по изборите да влезете во коалиција со истата таа партија. Добивањето датум во декември се користи само како изговор за да се прикрие вистината дека партиите од владината коалиција се борат единствено за гола власт. Јас верувам дека народот уште еднаш ќе види дека лагите на СДСМ и на партиите во владината коалиција нема во брзо време да ни го донесат датумот за преговори со ЕУ. Затоа, потребни се предвремени парламентарни избори кои би се организирале во што е можно поскоро време. На тие избори народот ќе може да каже што мисли за непринципиелните коалиции коишто се создаваат на лукративна основа – објаснува Стојаноски.
И од партијата на Зијадин Села, Алијанса за Албанците, која беше во коалциија токму со Алтернатива, велат дека власта го загуби и последното алиби, а тоа се евроинтеграциите.
Како што објаснуваат оттаму, власта сега е претворена во едно најобично криминално и корумпирано здружување кое ја држи во заложништво целата држава и целото општество.
– Кога веќе е извесно бугарското вето, инсистирањето на проширување на ова владино мнозинство само го докажува тоа што го тврдевме, односно дека станува збор само за партиски калкулации и за поделба на позиции и функции. Оваа влада веќе го загуби и последното алиби кое се нарекуваше евроинтеграции, па сега се сведе на едно најобично криминално и корумпирано здружување кое ја држи во заложништво целата држава и целото општество. Оваа власт пропадна, а тоа што остана се секојдневните скандали. Ние остануваме на ветеното пред граѓаните, а тоа силната борба против хибридниот режим сè до негово соборување – изјави Арбен Зеќири од Алијанса за Албанците.
Портпаролот на Левица, Амар Мециновиќ, вели дека владата е делегитимирана и дека единственото решение е да се организираат предвремени парламентарни избори.
Нам и на јавноста ни беше јасно дека датум нема да има, сега и мотивите на новото мнозинство потврдуваат само посилно забивање на канџите на олигархијата во сврзното ткиво на општеството.
– Владата и владејачката коалиција, како и да се прекројува, е повеќекратно делегитимирана, а тоа најдобро се гледа од резултатите на изборите, преку внатрепартиската криза на СДСМ, со недемократско коалицирање преку распределба на функции по партиски клуч и антиевропска политика која ја потврдува негативниот извештај на Европската комисија за напредок. Нам и на јавноста ни беше јасно дека датум нема да има, сега и мотивите на новото мнозинство потврдуваат само посилно забивање на канџите на олигархијата во сврзното ткиво на општеството. Опозицијата во однос на делегитимирана влада има морална иницијатива кон предвремени избори – и ништо повеќе. Покрај владиниот циркус, во поглед на вистинската политика на Република Македонија го нагласуваме молкот на Европската Унија за повредата на меѓународниот принцип на самоопределување и погрешно насочениот притисок кој го заобиколува бугарскиот дипломатски шовинизам. Покрај шеснаесет пресуди на Европскиот суд за човекови права за забрана за регистрирање на здруженија на граѓани на македонското малцинство, сега веќе и тековната насилничка надворешна политика на Бугарија – Габриел Ескобар пристигна во Скопје, а не во Софија за пронаоѓање компромис. Несомнено, по изборите и попромената на власт, нè очекува рехабилитација на македонската дипломатија и нормализирање на нестабилноста предизивикана од владата на СДСМ – објаснува Мециновиќ за Плусинфо.
Инаку, пазарењето на Заев со Гаши започна откако пратеникот на Беса, Кастриот Реџепи, не се појави на собраниската седница на која требаше да се гласа недоверба на владата. Откако цел ден го немаше никаде и откако лидерот на неговата партија Билал Касами го пријави во полиција како исчезнат, Реџепи испрати видео-порака и рече дека „висок функционер на ЕУ му потврдил дека датум ќе добиеме на 14 декември“, па затоа, како што истакна, одлучил да не се појави во Собранието и да не гласа за недоверба.
Засега сè уште не е познато името на тој висок функционер кој очигледно го прелажал Реџепи, иако, по неколку дена од неуспешниот обид да се турне владата, самиот пратеник изјави дека неговата сопруга гледала телевизија и го слушнала францускиот претседател Емануел Макрон како зборува за датум за Македонија.
Но, очигледно и сопругата погрешно го разбрала тоа што го слушнала, оти бугарската преодна влада во средата соопшти дека не го менува ставот, односно дека нема да го повлече ветото за Македонија на патот кон Европската Унија.