ЌЕ ДОБИЕМЕ СЀ ШТО НИ ТРЕБА Зеленски се заблагодари за 40-те милијарди на САД
Едноставно кажано, се работи за програма со која ќе добиеме сè што ни е потребно за одбрана, истакна Зеленски.
Украинскиот претседател Володимир Зеленски го пофали Претставничкиот дом на САД поради одобрениот пакет помош за Украина од 40 милијарди долари. Пакетот мора да биде одобрен и од американскиот Сенат, пред да го потпише претседателот Џо Бајден, пишува Би-Би-Си.
– Едноставно кажано, се работи за програма со која ќе добиеме сè што ни е потребно за одбрана -истакна Зеленски.
Зеленски во обраќањето изјави дека средствата ќе обезбедат оружје, муниција и поддршка за „истрагата за воени злосторства, како и за дипломатските напори“.
Претседателот на Украина му се заблагодари и на Бајден за потпишувањето закон, со што се овозможува брза испорака на опрема во земјата. Тој синоќа соопшти дека разговарал и со германскиот канцелар Олаф Шолц. Се зборувало за одбранбена помош, соработката во енергетскиот сектор и зајакнување на санкциите против Русија.
„Ние сме благодарни за дијалогот на високо ниво со Германија и поддршката за нашата борба“, напиша Зеленски на Твитер.
Украинскиот претседател претходно нагласи и дека руската агресија кон неговата земја би била спречена доколку Украина била членка на НАТО.
– Ако Украина беше дел од НАТО пред војната, немаше да има војна – им рече тој на студентите од Институтот за политички студии во Париз, говорејќи преку видео-врска.
Зеленски исто така рече дека неговата земја е „подготвена“ да води преговори „додека не стане доцна“, јави Си-Ен-Ен.
Портпаролот на германската влада изјави дека Шолц нагласил дека Русија треба „веднаш да го прекине конфликтот во Украина, да ги повлече војниците и да го врати територијалниот интегритет и суверенитет на Украина“.
„Канцеларот и претседателот на Украина разменија мислења и за многу конкретни, практични начини за продолжување на поддршката на Украина и се согласија да останат во близок контакт’, се вели во соопштението на портпаролот на германската влада.