ДОЖИВОТЕН ЗАТВОР ЗА КАВАДАРЧАНЕЦОТ ШТО СИ ГО УБИ БРАТОТ Судот констатира дека мотивот бил користољубие
Обвинетиот во целост го признал начинот на извршување на делото, онака како што било опишано во обвинителниот акт.
Основниот суд во Кавадарци изрече казна доживотен затвор за 43-годишниот С.И., откако тој ја призна вината за убиството на својот помлад брат, соопшти Основното јавно обвинителство Кавадарци.
Судот донел пресуда врз основа на признание на вина и го огласил С.И. за виновен за кривичното дело убиство од користољубие, по член 123 став 2 точка 4 од Кривичниот законик, се вели во соопштението на Обвинителството.
Според обвинението, злосторството било извршено на 27 јули годинава, на денот кога жртвата Илија Иванов го славел својот роденден. Меѓу двајцата браќа избила расправија, бидејќи обвинетиот верувал дека брат му има намера да го преземе целиот имот. Воден од користољубие и силни негативни емоции, С.И. го лишил од живот својот брат во домот на жртвата.
По настанот, обвинетиот го напуштил местото, а следниот ден повторно се вратил. Во деновите што следеле, се враќал повеќепати со цел да го прикрие делото – ги отстранувал трагите и го преместувал телото, кое подоцна било сокриено во помошен објект во дворот.
Во периодот од 30 јули до 5 август, кога телото било откриено, обвинетиот во повеќе наврати подигнувал пари користејќи ја банкарската картичка на жртвата, наведува обвинителството.
Обвинението против С.И. било поднесено на 28 октомври, а тој во целост го признал начинот на извршување на делото, онака како што било опишано во обвинителниот акт.
При изрекувањето на пресудата, Судот донел и решение со кое на осудениот му е продолжена мерката притвор, која ќе трае до почетокот на издржувањето на казната доживотен затвор.