ДОКАЖАНИ ЕКСПЕРТИ ЌЕ ПРАВАТ ПЛАН ЗА ЧИСТ ВОЗДУХ ВО СКОПЈЕ Не го доверуваме здравјето на оние што создаваат паника, порача ВМРО-ДПМНЕ

Планот за управување со квалитетот на воздухот во Скопје ќе го спремаат експерти со докажано искуство и успешни проекти позади нив, а не ПР кампањџии, соопшти советничката друпа на ВМРО-ДПМНЕ во Советот на Град Скопје.

„Мерките од овој план ќе бидат поддржани од градските власти и ќе се бара мерливост на резултатите и отчетност во реализацијата. За дел од мерките ќе бараме помош при финансирањето, а дел од мерките од овој план ќе се финансираат од пари на граѓаните и тие не смее веќе да се трошат како до сега, во проекти со сомнителен квалитет, без мерливи резултати и подготвувани од аматери“, објави советничката група на Фејсбук.

Прашањето на чистиот воздух е прашање на нашето здравје, се додава во објавата.

„Нашето здравје и здравјето на нашите деца нема да им го довериме на оние кои својот успех го мерат само во бројот на лајкови, кои ловат во матното поле на паниката која ја создаваат кај граѓаните, туку во мерливи резултати. Прашањата поврзани со квалитетот на воздухот ќе ги решаваме со вклученост на вистински стручњаци, затоа што се работи за здравјето на нашите деца, а не на кариерата на некој опозициски советник. Светските примери на градови кои влегле во борбата со аерозагадувањето и успешно се борат, покажуваат дека посветената борба трае долги години и не започнува со ПР акции на денот кога воздухот е најзагаден, туку со систематски поставен план за управување со квалитетот на воздухот и имплементација на неговите мерки“, објави советничката група на ВМРО-ДПМНЕ.