Девојката која беше најдена во провалија кај Велешкото Езеро е пренесена на скопските клиники

Велешанката А.С (29)  по која од вчера трагаше нејзиното семејство утрово околу 9,30 е пронајдена од полицијата по телефонски повик од непозната жена, информира портпаролот на СВР Велес Верољуб Додевски.

Девојката е извадена од провалија со помош на пожарникарите. Од медицинска екипа на Брза помош ѝ е дадена прва помош, а потоа итно е пренесена во велешката Општа болница каде што  ѝ е направената компјутерска томографија и се констатирани повеќе скршеници на телото – политрауматски повреди: скршеница на вратни прешлени, на клучна коска и на карлица и затоа тимот на лекари од Хирушкото одделение донел одлука попладнево во 17,30 часот со возило на Итна помош  да биде пренесена на понатамошно лекување во Клиниката за трауматологија во Скопје.

Според информацијата од СВР Велес, 29 годишната А.С вчера попладнето околу 16 часот била пријавена од нејзината сестра во Полициската станица во Велес како исчезната, а по што започнала потрагата од страна на полицијата.

Полицијата сега ќе истражува како девојката се нашла на дното на провалијата.

Лекарите велат дека била пронајдена смрзната по ладната ноќ, а изјавила дека ја плашело завивањето на шакалите во нејзина близина.

Како што информира портаролот на ЈЗУ Општа Болнива Велес  Весна Неделковска Николова со девојката по пронаоѓањето денеска во велешката болница разговарал и психијатар, а на кој девојката му изјавила дека само била премрзната.