Дали Британија е во третиот бран на пандемијата? Отклучувањето под знак прашалник

Научниците предупредуваат дека третиот бран на ковид-19 во Велика Британија можеби е веќе започнат, ставајќи го под знак прашалник планот за укинување на сите ограничувања во Англија.

Експертите сметаат дека секое зголемување на бројот на приеми во болница на пациенти со коронавирус може да предизвика тешкотии за здравствениот систем да се справи со големите листи на чекање за пациенти со други болести, пишува „Гардијан“.

Од „Даунинг стрит“ велат дека е рано да се шпекулира дали планот за укинување на сите ограничувачки мерки во Англија на 21 јуни може да продолжи.

Британскиот министер за вакцинација, Надим Захави, одби да негира дека некои ограничувања, како што се носењето маски и работа од дома, можат да останат во сила со цел да се намали ширењето на вирусот.

Постарите научни советници сметаат дека, кога е можно, работата од дома има смисла дури и по јуни, бидејќи тоа ќе го намали бројот на луѓе кои ќе стапат во контакт едни со други.

Министрите се справуваат со прашањето дали зголемувањето на случаите и понатамошното ширење на индискиот вид на вирусот може да го наруши планот на премиерот Борис Џонсон.

Истражувањето за јавно здравје на Англија, кое сугерира дека новата варијанта е многу пренослива и делумно отпорна на вакцините, предизвика загриженост дека трет бран може да ја преплави Националната здравствена служба.

Британскиот министер за финансии Риши Сунак е исто така претпазлив во предвидувањата дали плановите за заклучување ќе се реализираат.

– Ќе дознаеме повеќе како што ќе се приближуваме до датумот – рече Сунак.

Индиската варијанта се смета дека доведува до зголемување на бројот на случаи во делови на Велика Британија и има знаци на мало зголемување на хоспитализациите, како и до три четвртини од новите случаи на ковид-19 во Велика Британија се предизвикани од таа варијанта.

Мартин Мекеј, професор по европско јавно здравје на Лондонската школа за хигиена и тропска медицина, рече дека верува оти третиот бран веќе започнал.

– Веќе гледаме дека сегашните мерки не запираат случаи кои рапидно растат во многу делови на земјата. Ова изгледа како да сме сега во раниот трет бран – рече Мекеј.

Според него, отворањето во јуни претставува огромен ризик. Поради зголемувањето на случаите што ги гледаат сега, потребна е нова проценка за укинување на мерките, заклучи професорот на Лондонското училиште за хигиена и тропска медицина.