ЦЕНТАР СЕ ПОДГОТВУВА ЗА НОВАТА ГОДИНА Герасимовски најави новогодишна магија, но и построги казни за вандалите

Новогодишни елки, светлосни фигури, украсни лед светилки и други новогодишни украси ќе бидат поставени низ општина Центар, најави денеска градоначалникот Горан Герасимовски.

Украсувањето ќе започне од улицата Орце Николов и ќе продолжи кон улиците Боемска 1 и 2, каде на неколку локации ќе бидат поставени мрежи со светилки, светлосни фигури на бандери, ѕвездено небо и новогодишна елка. Герасимовски најави дека ќе биде накитен и Скверот пред општината, а исто така и пред хотел „Јадран“, каде ќе биде организиран новогодишен базар, кој ќе се одржува неколку дена пред новогодишната ноќ. Тој откри дека во моментов се договараат македонски музичари кои ќе ги забавуваат граѓаните за време на базарот.

Градоначалникот упати апел до жителите на Центар, особено до помладите, да не ја уништуваат урбаната опрема, но исто така најави дека ќе се бараат поригорозни санкции, како за сторителите, така и за нивните родители.

– Жално е кога ќе видиме дека во нешто што сме вложиле труд и пари, а некој тоа го уништува. По демолирањето на игралиштата во текот на летото, побаравме поддршка од полицијата и малку се стави ред во општината. Сега, со најновиот случај кога беше украден багер и уништено приватно возило, исто така интерниравме, дадовме снимки на полицијата и чекаме да ги фатат сторителите. Ќе побараме да се променат санкциите, покрај малолетните сторители, да бидат санкционирани и родителите. Покрај паричните казни, предлагаме малолетниот сторител и неговите родители да вршат општокорисна работа како дел од санкциите – истакна Герасимовски.

Градоначалникот зборуваше за актуелните и за идните проекти на Општината. Тој информираше дека Општина Центар е најтранспарентна општина која секогаш е отворена за соработка со медиумите и граѓаните.

– Во Општина Центар работиме одговорно, транспарентно и домаќински. Во изминатите три години од мојот мандат потрошив нула денари за патни трошоци во странство и нула денари за угостителски услуги – рече Герасимовски.

Тој нагласи дека буџетот што сега го има Општината, не се споредува со ниеден буџет од минатото, што се должи на доброто менаџирање.

– Нашата општина е поразлична од сите други затоа што го слушаме ставот и мислењето на сите советници, а потоа сите проекти во Советот ги гласаме едногласно. Имаме можност граѓаните да дадат свои предлози, идеи и сугестии за подобрување на функционирањето на општината, бидејќи подобрите услови за живот на граѓаните се наш приоритет – рече Герасимовски.