По една недела интензивни проби во Малта, Ана Стојаноска е подготвена да ја претстави Македонија на 24. издание на Јуниорскиот евросонг со песната „Идната јас“.

Македонските граѓани ќе можат да гласаат онлајн за нашата претставничка од вечерва, петок, во 23:59 часот, до утре, сабота, во 20:59 часот, непосредно пред почетокот на фестивалот. Гласањето е бесплатно и се одвива преку официјалната интернет-страница на Евровизија: https://vote.eurovision.com/.

За конечниот резултат ќе одлучуваат жирито и публиката. Шеснаесет петчлени жирија од различни европски земји ќе ги оценуваат настапите на младите изведувачи, меѓу кои и настапот на Ана Стојаноска со песната „Идната јас“.

Според евровизискиот систем, гласовите на жирито учествуваат со 50 проценти во конечниот резултат, додека останатите 50 проценти ги носи публиката. Поените од двата гласачки блока се комбинираат за да се утврди конечниот пласман на учесниците.

Преносот во живо на 24. издание на Јуниорскиот евросонг ќе може да се следи на Националниот сервис утре, сабота, со почеток во 21 часот.

Поддршката од публиката е можност македонските гледачи да придонесат за резултатот на Ана Стојаноска на овогодинешниот детски музички фестивал.

The post „ИДНАТА ЈАС“ ЌЕ ОДЕКНЕ НА ЈУНИОРСКИОТ ЕВРОСОНГ Ана Стојаноска подготвена за големиот настап appeared first on plusinfo.mk.

Уметноста има моќ да ги надмине границите на времето, да разбуди емоции и да ги поврзе луѓето преку универзалните приказни за љубовта, жртвата и човечката судбина. Токму таква приказна носи балетската претстава „Дамата со камелии“, која вечерва, со почеток во 20 часот, ќе биде изведена на сцената на Националната опера и балет, во рамките на партнерството со Видеолотарија Касинос Австрија.

Инспирирана од познатата приказна за Маргарита и Арман, претставата ја доловува нивната љубовна судбина преку моќниот спој на балетот, музиката и сценскиот израз. Музиката на Џузепе Верди, препознатлива по мелодиската убавина и силниот емоционален набој, ја продлабочува драматургијата и ја доловува борбата меѓу личните чувства, жртвата и општествените ограничувања.

Зад сценската приказна стои меѓународен уметнички тим. Диригент е Едуард Амбарцумјан од Ерменија, додека кореографијата е на Василиј Медведев, руски кореограф со соработки со водечки балетски театри, меѓу кои Бољшој во Москва и Марински во Санкт Петербург. Сценографијата и костимографијата се дело на Павол Јураш од Словачка, а концерт-мајстор е Верица Ламбевска.

Во главните улоги на Маргарита и Арман настапуваат Марија Кичевска-Шокаровска и Франциско Хименес Руиз од Шпанија, заедно со солистите, балетскиот ансамбл и оркестарот на Националната опера и балет.

Поддршката на културата е инвестиција во општеството, креативноста и генерациите што доаѓаат. За Видеолотарија Касинос Австрија, партнерството со националните културни институции претставува значаен дел од општествената одговорност и посветеноста на создавањето вредности што го надминуваат секојдневието.

„Веруваме дека културата има моќ да инспирира, да отвора нови перспективи и да ги поврзува луѓето. Затоа, поддршката на културните институции и уметничките проекти ја гледаме како придонес кон општество во кое уметноста е достапна, препознаена и вреднувана. Особено е важно да ги приближуваме ваквите содржини до младите и да создаваме можности новите генерации да ја откриваат убавината и моќта на уметноста“, порачуваат од Видеолотарија Касинос Австрија.

Со поддршката на културните содржини и партнерството со институциите што го чуваат и развиваат уметничкото творештво, Видеолотарија Касинос Австрија го потврдува својот придонес кон побогат културен живот и создавање вредности што оставаат траен белег во заедницата.

The post ЉУБОВ, ЖРТВА И УМЕТНОСТ НА ЕДНА СЦЕНА „Дамата со камелии“ со поддршка од Видеолотарија Касинос Австрија appeared first on plusinfo.mk.

The post СЛИКАТА „ШАХИСТИ“ НА НИКОЛА МАРТИНОСКИ ПРОДАДЕНА ЗА 44.000 ЕВРА НА АУКЦИЈА ВО ФРАНЦИЈА Ја купил сопственик на галерија од Белград appeared first on plusinfo.mk.

Сања Јовановска дипломирала на Факултетот за ликовни уметности во Скопје, отсек графика, под менторство на професорот Димитар Малиданов. Досега учествувала на повеќе групни изложби, но ова е нејзиното прво самостојно претставување пред публиката.
Нејзиниот ликовен израз е реалистичен, особено во портретите, во кои прецизноста и вниманието кон деталите се толку впечатливи што гледачите често помислуваат дека пред себе имаат фотографија, а не слика.

Покрај класичните подлоги, платното и дрвото, Јовановска ја пренесува својата уметност и на необични површини – од ѕидови до облека и обувки, претворајќи ги маиците, еспадрилите и патиките во мали уметнички дела.

Првата самостојна изложба е можност публиката одблизу да го запознае нејзиниот творечки свет. Изложбата ќе биде отворена утре (17 октомври) во 20 часот во Бифе Тафталиџе.

The post ЗА НЕЈЗИНИТЕ СЛИКИ ЧЕСТО МИСЛАТ ДЕКА СЕ ФОТОГРАФИИ Прва самостојна изложба на уметницата Сања Јовановска appeared first on plusinfo.mk.

Вечерва (15.октомври) почнува 45. Скопски џез фестивал, кој во текот на 4 фестивалски вечери ќе ја претвори Националната опера и балет во центар на современите џез-истражувања. Годинашното издание носи изведувачи од дури 13 земји, а организаторите нагласуваат дека речиси сите концерти се ексклузивни настапи, подготвени специјално за скопската публика во овој период.

Скопскиот џез фестивал со години гради репутација на настан што не се задоволува само со претставување на добро познатите музички форми, туку го истражува и она што џезот може да стане. Додека многу европски фестивали се насочени кон зачувување на традицијата, скопскиот фестивал се издвојува со програма што отвора простор за експериментирање, нови звучни решенија и редефинирање на современиот џез. Токму таа програмска ориентација, според организаторите, е една од причините за неговиот култен статус на европската и светската џез-сцена, велат организаторите.

Првата фестивалска вечер, во Националната опера и балет, во 20 часот ќе ја отвори Zlatko Kaučič Kombo BC од Словенија со програмата „Bravery of the Brave“. Во 22 часот следува Leonhard Skorupa New Quispel Octet, меѓународен состав со музичари од Австрија, Германија, САД и Македонија. По полноќ, на Малата сцена на Националната опера и балет, ќе настапат италијанскиот перкусионист Пасквале Мира и американскиот тапанар Хамид Дрејк со проектот „Lahsa“.

На 16 октомври, во рамките на програмата „Punkt International“, ќе настапат норвешките музичари Ејвинд Орсет и Јан Банг со „Dream Logic“, а потоа и исландскиот тандем Скули Сверисон и Олоф Арналдс. По полноќ, програмата „Punkt Live Remix“ ќе ја продолжат Ерик Оноре и Јан Банг од Норвешка. На 17 октомври, вечерта ќе ја одбележат македонскиот состав на Андреа Мирческа со „Lullaby for Lunatics“ и јужноафриканскиот музичар Ндудузо Махатини, а по полноќ следуваат британскиот пијанист Александар Хокинс и шведската вокалистка Софија Јернберг со проектот „Musho“.

Завршната вечер, на 18 октомври, носи два различни музички пристапа: São Paulo Underground, состав поврзан со американската и бразилската музичка сцена, и францускиот Vincent Peirani Quintet со проектот „Living Being“. Освен концертната програма, фестивалот ја продолжува традицијата на прикажување значајни музички документарни филмови, а на програмата повторно е и работилницата „Џез за деца“. Дизајнот на ова издание е на ликовниот уметник Џоле Јовановиќ.

Организаторите нагласуваат дека на ова издание не гледаат како на јубилејно, туку како на продолжување на програмската определба фестивалот да ги претставува актуелните и иновативни текови во џезот, без приспособување кон очекувањата на масовната публика. Во следните четири дена, Скопје повторно ќе биде место за средба на различни музички култури, жанровски експерименти и уметници што ја поместуваат границата на она што го подразбираме под џез.

The post ПОЧНУВА 45. СКОПСКИ ЏЕЗ ФЕСТИВАЛ Од Норвешка и Исланд до Јужна Африка и Бразил, годинашното издание носи изведувачи од 13 земји appeared first on plusinfo.mk.

Актерот Ѓорѓи Јолевски е добитник на државната награда „23 Октомври“ за остварување во областа на културата и уметноста.

За остварување во областа на науката, наградата им се доделува на проф. д-р Стојко Стојков, историчар и на проф. д-р Виктор Лилчиќ-Адамс, археолог.

Одлуката ја донесе Одборот за доделување на државната награда „23 Октомври“, во согласност со Законот за државните награди, законите за изменување и дополнување на Законот за државните награди.

Наградата ќе им биде врачена на добитниците на 23 октомври 2026 година (петок) во 11 часот, во Собранието на Република Северна  Македонија.

The post АКТЕРОТ ЃОРЃИ ЈОЛЕВСКИ ДОБИТНИК НА НАГРАДАТА „23 ОКТОМВРИ“ Наградени се и професорите Стојко Стојков и Виктор Лилчиќ-Адамс appeared first on plusinfo.mk.

Во време кога секојдневието често ја потиснува потребата за вистинска поврзаност, младиот уметник Никола Тренов преку сликарството се навраќа на едноставните, но суштински нешта што го прават животот. Неговата прва самостојна изложба, насловена „Примитивна хармонија: Есенција на постоењето“, ќе биде отворена на 14 октомври, во 20 часот, во галеријата на Младинскиот културен центар – Скопје.

Изложбата е визуелна приказна за човекот и неговата постојана потрага по близина, љубов, слобода, припадност и заедништво, но и за односот со природата и светот што го опкружува. Преку смела палета на бои, експресивни форми и препознатлив ликовен јазик, Тренов создава композиции во кои човечката фигура станува носител на емоциите, сеќавањата и личните доживувања.

Во неговото творештво се преплетуваат влијанија од фовизмот, балканската наива, модернизмот и кубизмот, како и поетичноста и интимноста поврзани со делата на Марк Шагал. Овие уметнички правци, сепак, не се само модели што авторот ги следи, туку појдовни точки за градење сопствен израз, во кој различните влијанија се преобразуваат во личен и препознатлив визуелен свет.

„Примитивна хармонија“ ја преиспитува идејата дека суштината на постоењето често се крие токму во наједноставните човечки искуства. Допирот, довербата, љубовта, музиката, природата и заедничкото живеење се мотивите преку кои Тренов зборува за човекот како суштество што не може да постои изолирано, туку постојано трага по поврзаност и хармонија.

Изложбата може да се доживее како своевиден битов роман насликан со четки – низа визуелни фрагменти што заедно создаваат поширока слика за човечкото искуство.

Преку својот пристап, Тренов ја отвора можноста за поинакво читање на секојдневието – не како низа обични настани, туку како простор во кој се создаваат блискоста, припадноста и чувството дека сме дел од нешто поголемо.

Никола Тренов е роден во 2000 година во Скопје. Дипломирал на Факултетот за ликовни уметности при УКИМ во 2024 година, а во 2026 година магистрирал на истиот факултет во областа на сликарството.

Добитник е на првото место на Конкурсот за млади сликари, организиран од Шпаркасе банка и Меѓународната ликовна колонија „Вевчански видувања“ во 2024 година, како и на наградата за најдобро дипломиран студент на ФЛУ за академската 2023/24 година. Учествувал на повеќе групни изложби и ликовни колонии, а од 2024 година е член на Друштвото на ликовните уметници на Македонија. Неговите дела се застапени во приватни колекции.

The post ЧОВЕКОТ, ЉУБОВТА И ПОТРЕБАТА ЗА ПРИПАДНОСТ Никола Тренов со прва самостојна изложба во МКЦ: „Примитивна хармонија“ appeared first on plusinfo.mk.

Канадската поетеса, есеистка и преведувачка Ен Карсон денеска е прогласена за добитничка на Нобеловата награда за литература за 2026 година, соопшти Шведската академија во Стокхолм.

Карсон, која има 76 години, ја доби наградата „за нејзиниот смел и инвентивен опус, кој, во разигран дијалог со класичната традиција, создаде нови форми за современата литература“.

Карсон е позната по делата кои често ги преминуваат границите меѓу поезијата, фикцијата и научната литература. Таа, исто така, преведувала старогрчка литература и повеќе од 30 години била професорка по класични студии.

Нобеловата награда се доделува за животното творештво на авторот и се смета за најпрестижното признание во светската литература. Добитникот годинава ќе добие паричен износ од 12 милиони шведски круни (околу 1,2 милиони долари), без оглед дали наградата е доделена на поединец, мала група добитници или организација.

Минатата година Нобеловата награда за литература му припадна на унгарскиот писател Ласло Краснахоркаи, чии надреални и анархични романи комбинираат мрачен поглед кон светот со црн хумор. Тој ја доби наградата за дела за кои жирито оцени дека ја потврдуваат моќта на уметноста во време на „апокалиптичен ужас“.

Трите Нобелови награди за наука беа објавени претходно оваа недела. Нобеловата награда за медицина им припадна на тројца научници чија работа доведе до развој на алатка што користи светлина за да помогне во откривањето на начинот на кој функционира мозокот. Наградата за физика му припадна на научник за неговите истражувања кои помогнаа да се разјасни природата на ретка група неутрина, додека Нобеловата награда за хемија им припадна на двајца научници за нивната работа на разјаснување на мистериозните огледални слики во молекулите, откритие што се користи во развојот на голем број лекови.

Нобеловата недела ќе заврши в петок со соопштувањето на Нобеловата награда за мир, додека Нобеловата меморијална награда за економски науки ќе биде објавена во понеделник.

The post КАНАДСКАТА ПОЕТЕСА ЕН КАРСОН ДОБИ НОБЕЛОВА ЗА ЛИТЕРАТУРА Наградена е за нејзиниот смел и инвентивен опус appeared first on plusinfo.mk.

Руската банка „Сбер“ го објави продолжението на познатиот роман „Мртви души“, (Мртви души. Втор том. Воскресение), од Николај Василиевич Гогољ, напишано со „Гига-чет“ (GigaChat). Книгата може да се нарача преку интернет, а наскоро се очекува да биде достапна и на руските платформи за електронска трговија, во Московскиот дом на книгата, како и во книжарниците низ Русија.

На проектот кој траел повеќе од една година учествувале историчари, книжевни експерти, лингвисти и инженери, со цел да создадат продолжение што најдобро ќе го долови книжевниот стил и јазик на Гогољ. Во рамки на проектот, ВИ ги анализирала сите дела на Гогољ, како и на други значајни руски писатели, меѓу кои и Александар Пушкин, Фјодор Достоевски и Иван Тургењев. Меѓу другото, биле опфатени и филозофски и библиски текстови, како и различни уметнички дела кои имале влијание врз творештвото на Гогољ.

Идејата била да се види како би изгледало продолжението на делото кое самиот писател го уништил кон крајот на својот живот.

– И по повеќе од еден век од смртта на писателот, неговото дело со децении остана предмет на книжевни истражувања, претпоставки и дебати. Затоа, со новово издание, кое е спој на класична руска книжевност и современа вештачка интелигенција, сакаме да видиме како ќе изгледа неговото продолжение – објаснуваат експертите.

GigaChat е генеративен модел на вештачка интелигенција за разговор развиен од руската корпорација за финансиски услуги Сбербанк, позициониран како руска алтернатива на моделите како ChatGPT.

The post ВЕШТАЧКАТА ИНТЕЛИГЕНЦИЈА НАПИША ПРОДОЛЖЕНИЕ НА „МРТВИ ДУШИ“ ОД ГОГОЉ Прво прочитала многу книги од руската книжевност appeared first on plusinfo.mk.

На 9 октомври, со почеток во 20 часот, на сцената на Националната опера и балет ќе биде изведена операта „Турандот“ од Џакомо Пучини – едно од највпечатливите дела во оперскиот репертоар, препознатливо по својата грандиозна музика, драматичната приказна и незаборавните вокални моменти.

Со изведбата ќе диригира Џанлука Мартиненги од Италија, додека режијата, сценографијата и костимографијата се дело на светски реномираниот режисер Џанкарло дел Монако од Италија, чие име е синоним за врвни оперски продукции. Кореографијата е на Саша Евтимова, концерт-мајстор е Климент Тодороски, а хор-мајстори се Ѓургица Дашиќ и Јасмина Ѓорѓеска.

Во насловната улога на принцезата Турандот ќе настапи Николина Јаневска, додека улогата на Калаф ќе ја толкува гостинот од Кина, тенорот Ѕ-Жао Гуо. Во улогата на Лиу ќе настапи Биљана Јосифов, Тимур ќе го толкува Игор Дуловски, а во останатите улоги ќе настапат: Драган Ампов, Никола Стојчевски, Јане Дунимаглоски, Диме Петров, Марјан Николовски, заедно со хорот, оркестарот и балетскиот ансамбл на Националната опера и балет.

„Турандот“ е опера во три чина од Џакомо Пучини. Напишана е по либретото на Џузепе Адами и Ренато Симони, а базирана на адаптацијата на Фридрих Шилер на драмата „Турандот“ од Карло Гоци. Пучини умира недовршувајќи ја операта, која подоцна е завршена од Франко Алфано. Одликувајќи се со „невообичаен“ музички материјал, во кој предничи иновативната употреба на хорот и оркестарот, стилот на Пучини во ова оперско дело е особено препознатлив по широките, експресивни мелодии. „Турандот“ изобилува со моменти на восхитувачка мелодиска убавина, која особено доаѓа до израз во незаборавната тенорска арија, една од најпознатите во оперската литература – „Никој не спие“ („Nessun dorma“).

The post „ТУРАНДОТ“ НА 9 ОКТОМВРИ ВО НОБ Грандиозна музика и драматична приказна од Џакомо Пучини appeared first on plusinfo.mk.