БУКЕТИ ОД ОВОШЈЕ, ЗЕЛЕНЧУК И ПО НЕКОЈ ЦВЕТ Андријана Облешевска е фудфлористка, а Зелениот пазар – нејзино царство
„Зеленото пазарче е мојата оаза среде бетонската џунгла. Тука има продавачи со кои на некој начин паралелно сме пораснале и генерално, знаат со што се занимавам, сите ме поддржуваат и ми дозволуваат да ги одберам најубавите овошки и зеленчуци од нивните тезги. Она ’може ли да бирам‘ е привилегија и задоволство кога сум тука“, вели креативната Андријана Облешевска.
Нашата соговорничка е економистка по професија, музичарка во душа, ракотворка во тело. Вака се опишува себеси и додава дека и сега и отсекогаш била во игра со овие три.
Андријана Облешевска не ја запознавме ниту како економистка, ниту како музичарка, ама затоа не воодушеви со своите ракотворби и тоа, не какви било, туку генијални. Пардон, евгенијални.
Ако се прашувате зошто евгенијални, ќе ви кажеме дека е тоа името на нејзиниот бренд „Евгенијално A&C“ специјализиран за изработка на уникатни и извонредни букети и корпи направени од зеленчук, овошје и цвеќиња.
Кованицата ’евгенијално‘ е нејзина измислица, а инспирацијата доаѓа од името на нејзината ќерка – Евгенија.
Инаку нејзините букети и корпи спаѓаат во таканаречената фудфлористика, правец кој потекнува од Русија и таму е особено популарен.
Андријана се запознала со фудфлористиката пред речиси 3 години.
„Ѝ беше роденден на моја многу блиска другарка, а идеите за тоа што да ѝ купиме ни беа исцрпени и ни фалеше нешто ново и свежо. Јас веќе ги следев и истражував руските креативки и фудфлористки, од каде е измислен овој нов правец и се сетив на тоа дека би било баш добро сега да пробам да направам еден ваков жив букет. Беше пролет, сезона на најубавите плодови и цвеќиња, мојата најинспиративна сезона. Овој прв букет е сè уште еден од моите најубаво искреирани букети. Веројатно бидејќи беше наменет за мојата најдобра другарка. Инаку, беше комбинација од калинка, киви, лимони, јагоди, јаболчиња и нарциси. Букетот не само што беше преубав, туку беше и причина да продолжам да го правам ова до денеска. Добив голема поддршка и од најблиските и еве ме, цветам до ден денес“, се смее Андријана.
Целиот текст прочитајте го на порталот „Арт кујна“.