БУГАРИЈА И НЕКОЛКУ ЗЕМЈИ JA ЗАКОЧИЈА СРБИЈА ВО ПРЕГОВОРИТЕ СО ЕУ Вучиќ се прашува што им згрешил на Бугарите

Српскиот претседател Александар Вучиќ вчера изјави дека амбасадорите на Шведска, Финска, Холандија, Хрватска и Бугарија гласале против отворањето на кластерот 3 од преговорите на Србија со ЕУ, јавија српските меидуми.

Вучиќ за новинарите во Цирих изјавил дека тие земји вчера не се согласиле за отворање на новиот кластер, но има уште седум дена до конечната одлука.

– Унгарија ќе го закаже предлогот за следната недела, нема сомнеж за тоа. Имаше осум земји, Шведска, Финска и Холандија и секако Хрватска и Бугарија. Господ знае што ли им згрешивме на Бугарите, јас не можам да си објаснам, но разбирам сè за Хрватите. Важна вест за нас е да разговараме со сите. Германија апсолутно е за отворање на кластерот 3. Франција и Италија исто така беа таму, а Германија им се придружи. Им благодарам ако го отворат, но им благодарам и ако не го отворат. Ќе се стремиме следната година да бидеме најголемата растечка економија во Европа – рече Вучиќ.

РТС, повикувајќи се на дипломатски извори во Брисел, претходно објави дека и на третата средба на ниво на амбасадори немало неопходен консензус на оваа тема.

Следната расправа за отворањето на кластерот би можела да се одржи на 11 декември. Меѓувладината конференција на која би се отворил кластерот треба да се одржи во неделата меѓу 16 и 20 декември.

За Србија, на маса е Кластер 3 – „Конкурентност и инклузивен раст“ во кој се групирани осум поглавја, од кои пет се веќе отворени пред да биде воведен концептот кластери со новата методологија.

Вучиќ рече и дека додека е претседател на Србија, што ќе биде уште две години, нема да има признавање на независноста на Косово и дека Србија ќе биде воено неутрална.