БОЖИНОВСКА ЌЕ ГО ВРАЌА ИЗГУБЕНИОТ СЈАЈ НА ИНЖЕНЕРСКАТА ПРОФЕСИЈА Во таква средина младите инженери ќе можат да напредуваат
Министерката за енергетика на годишнината од основањето на МАКО СИГРЕ најави дека ќе го обедини инженерскиот потенцијал на земјава.
Обединувањето на инженерскиот потенцијал и давањето можност на младите инженери да го добијат заслуженото место и да напредуваат во професијата е значајно за економскиот и технолошкиот напредок на земјата, изјави денеска министерката за енергетика Сања Божиновска на одбележувањето на 30-годишнината од основањето на македонскиот национален комитет на CIGRE – МАКО СИГРЕ.
– Со обединување на стручниот потенцијал, ќе создадеме средина каде што професионализмот и одговорноста се ценат, инженерските идеи се реализираат, а младите инженери го добиваат заслужениот простор за напредок. Вашата работа е основа за иднината на енергетскиот сектор, и Ви благодарам за сè што правите и ќе продолжите да правите – рече Божиновска.
Таа нагласи дека инженерската професија е основен двигател на економскиот и технолошкиот напредок.
– Успехот на нашата работа понекогаш не се гледа веднаш, но, ние знаеме дека градиме нешто што ќе го наследат идните генерации. МАКО СИГРЕ е семејство на професионалци, мост помеѓу генерации инженери, кој гарантира континуитет во преносот на знаење. Иднината е во рацете на младите инженери, но за да успеат, потребна им е поддршката и знаењето што само искусните професионалци можат да го понудат – рече Божиновска.
Таа ја потенцира важноста на придонесот на македонските инженери во меѓународните организации како CIGRE, кои ја позиционираат Македонија како важен партнер на глобалната сцена.
– Вашата работа е гордост за нашата држава и пример за тоа како се надминуваат границите на знаењето и технологијата – рече Божиновска.
На настанот присуствуваа истакнати личности од инженерската и академската заедница, меѓу кои и претседателот на CIGRE Константин Папаилиу, генералниот секретар на CIGRE Филип Адам, и претседателот на националниот комитет на CIGRE, Сашо Салтировски.
Пред настанот Божиновска оствари и директна средба во просториите на министерството, на која им посочи дека Министерството останува посветено на развој на енергетската инфраструктура, унапредување на иновациите како и зајакнување на соработката со стручната и академската заедница за изградба на одржлива енергетска иднина.
МАКО СИГРЕ, со повеќе од 100 членови вклучувајќи водечки енергетски компании и универзитети е значаен партнер во унапредување на енергетските политики и воведување иновации.