„БОРА ВООПШТО НЕ Е ДОБРО, СЕ МОЛИМЕ“ Влошена здравствената состојба на Бора Ѓорѓевиќ, приклучен е на респиратор

Фронтменот на легендарната група „Рибља чорба“, Бора Ѓорѓевиќ (71) пред неколку дена беше хоспитализиран во болница во Љубљана, поради проблеми со белите дробови. Бора добил пневмонија, а во меѓувреме, состојбата му се влошила.

Бора во саботата бил приклучен на кислород, а во неделата и на респиратор, откако неговото здравје значително се влошило.

Неговиот менаџер Бане Обрадовиќ ја откри оваа вест за српски „Ало!“.

– Бора во моментот е на респиратор поради компликации предизвикани од хронична опструктивна болест на белите дробови. Се надеваме на подобри вести во наредниот период – рекол менаџерот на Бора, Бане Обрадовиќ, а сега се огласи и блискиот пријател на Бора, Гале од групата „Кербер“, кој откри дека и самиот се слушнал со Бане и дека состојбата на Бора воопшто не е добра.

– Се слушнав денеска со неговиот менаџер. Бора не е добар, воопшто не е добар. Не би ја отворал премногу таа приказна, не гледам како би можел да се опорави. Тој е навистина голем борец, ние сме добри пријатели. Не можев да дојдам до него, навистина е болен, во болница е, во Словенија. Нема позитивни вибрации дека тоа ќе излезе на добро – рекол Гале за српските медиуми и додал:

– Се надевам и му се молам на Господ, но не е добро… Не се озборувања, ниту претерувања… Нашиот Бора навистина не е добро – додал Гале, кој бил на работ на солзи.

Бора Ѓорѓевиќ има проблеми со белите дробови, а состојбата значително му се влошила. Фронтменот на „Рибља чорба“ пред шест дена е задржан во болница во Љубљана поради проблеми со белите дробови.