Болните од ковид 19 ќе почекаат на лекот против грип од Јапонија, а ќе се лекуваат и со плазма од излекуваните
Рано е за точно да се утвди кои лекови какви резултати даваат во лекувањето на заболените од ковид 19. Се е врз основа на искуства од публикации, но без клиничката студија, вели министерот Венко Филипче.
Заболените од ковид -19 кои се лекуваат на Инфективната клиника засега нема да ја примаат терапијата со препаратот „Авиган”, одговори на денешната прес-конференција министерот Венко Филипче на прашањето на Плусинфо. Тој потврди дека лекувањето со комбинираната терапија дава резултати.
Овој лек против грип фавипиравир , познат и како „Авиган”, се произведува во Јапонија, а се користи и во Кина и во неколку други земји во лекување на заболени од новиот вирус. Германија најави дека ќе го воведе овој препарат. Тој се покажал клинички ефикасен при лекувањето на заболени од новиот вид коронавирус, соопшти неодамна шефот на Центарот за биотехнологии на кинеското Министерство за наука и техника, Чан Синмин.
– Рано е за точно да се утвди кои лекови какви резултати даваат во лекувањето на заболените од ковид 19. Се е врз основа на искуства од публикации, но без клиничката студија. Ние вклучивме група лекови, комбинираната терапија, во рамки на клиничка стурија, а со одобрение од стручниот колегиум од Инфективната клиника,. Се што ќе биде на располагање во рамки на клиничката студија, ќе го добијат и нашите пациенти – појасни Филипче.
На прашањето на Плусинфо дали се користи комбинацијата хидроскихлороквин- азитромицин, Филипче потсети дека комбинираната терапија, која почна се употребува кај нас во рамки на клиничка студија, не им се дава на сите пациенти кои се лекуваат од ковид-19 на Инфективната клиника, бидејќи има строга контраиндикација кај пациенти со проблеми со срцето.
Министерот Филипче најави дека и кај нас во ќе почне да се користи крвната плазма од веќе излекувани пациенти од ковид 19. Од одговорните на Институтот за трансфузиологија има виза дека може да се подготви крвната плазма од досега излекуваните 20 пациенти.
– Има неколку публикувани случаи дека антитела на рековалсценти можат да помогнат во лекувањето на заразените пациенти. Започнавме подготовки на Трансфузиологија, каде веќе се подготвува протокол, плазмата би требало да се земе од пациентите коишто се излекувани, а во соодветен период. Протоколот ќе биде спремен и в понеделник ќе се дискутира на стручниот колегиум во институтот, па во Комисијата за заразни болести – одговори Филипче на новинарски прашање на „Слободен печат“.