БИДИ ХРАБАР, ТРАЈКО Арсовска го повлече својот потег и му одговори на Славески
Градоначалничката на Скопје, Данела Арсовска, одговори на објавата на претседателот на Советот на Град Скопје, Трајко Славески.
„Бидејќи Трајко Славески никогаш не успеал да собере храброст самиот да донесе одлука, а овој пат бара поддршка од мене – ја има“.
Ова се наведува во соопштение од градоначалничката на Скопје, Данела Арсовска, кое е одговор на објавата на претседателот на Советот на Град Скопје, Трајко Славески, кој преку објава на социјалните мрежи напиша дека Арсовска е на потег во врска со случајот со приватните превозници.
„Го охрабрувам Трајко Славевски, како што и веќе на писмено му одговорив во текот на седницата на Советот, со доставување на мислењето од моја страна кое го бараше, да ја стави точката на приватните превозници на дневен ред и заедно со останатите советници да ја разгледаат и да донесат одлука дали ќе ја поддржат и ќе прифатат зголемена цена за превоз на приватните превозници или не. Биди храбар Трајко“, му порача Арсовска на Славески.
Славески претходно на социјалната мрежа Икс објави дека приватните превозници бараат зголемување на цена на услуги преку член во Советот и дека на потег е градоначалничката Данела Арсовска. Тој сподели документи: Барањето за мислење со предлог по иницијатива од член на Совет на Град Скопје за покачување на цената на услугата на приватните превозници, ангажирани од Јавното сообраќајно претпријатие – Скопје и Иницијативата за отпочнување постапка за покачување на цената од членот на Советот на Град Скопје, Горан Арсов.