БИ БИЛ ГОЛЕМ ПРОПУСТ ЗА БУГАРСКАТА НАДВОРЕШНА ПОЛИТИКА Ќучук смета дека земјава не треба да се остави надвор од преговорите со ЕУ
Според постојаниот известувач на Европскиот парламент за С Македонија, има тензија на историски, но не и на политички план.
Новата Влада во Софија успеа да започне добар процес кој има за цел да ги зближи Бугарија и С Македонија, да ја погледне историската перспектива, а во исто време да ја погледне и перспективата во ЕУ.
Ова за бугарскиот ТВ канал Нова ТВ го соопшти Илхан Ќучук, копретседател на либералната партија АЛДЕ, европратеник од ДПС/„Обнови ја Европа“ и постојан известувач на Европскиот парламент за С Македонија.
Како што јави дописникот на МИА од Софија, според Ќучук, има тензија на историски, но не и на политички план. Тој рече дека работел со овие луѓе долги години и веќе ја има нивната доверба. Договорот меѓу двете земји од 2017 година, вели, го отвори евроатлантскиот пат за С Македонија.
Запрашан дали верува дека Бугарија треба да го укине ветото за почеток на преговорите на С Македонија со ЕУ, тој рече дека верува оти Бугарија треба активно да работи во рамките на правилата договорени меѓу двете соседни земји.
– Ќе биде голем пропуст на бугарската надворешна политика ако го дозволиме овој луксуз – Албанија да започне преговарачки процес, а С Македонија да се остави настрана – рече Илхан Ќучук.