Барањата за поддршка на плати ја укочија исплатата на редовните плати пред Велигден

Доставувањето барања за поддршка за плати за месеците февруари и март ги забави службите во Управата за јавни приходи па дел од фирмите кои редовно исплаќаат плата се жалат дека поради тоа долго чекаат на шалтерите и се загрижени дека нивните вработени нема да ги добијат платите пред празниците. Од УЈП велат дека приемот и обработката на платите оди тековно, но поради зголемен обем на пресметки може да има и застои.

Фирми и сметководствени куќи деновиве се жалат дека чекаат повеќе од една недела во Управата за јавни приходи за пресметка на платите.

– Вакви застои досега немало во УЈП. Не знам што се случува, но можно е нашите вработени да не добијат плата пред паразникот – велат од скопска фирма.

Од Управата за јавни приходи велат дека тековно оди работењето, но може да има мали застои поради исправки на МПИН пресметките.

– Приемот и обработката на МПИН пресметките функционира стандардно без застој, но поради зголемениот обем на пристигнати МПИН пресметки, односно повеќекратното испраќање на пресметките и исправки на МПИН од страна на фирмите, може да има мало задоцнување – велат од УЈП.

Од УЈП велат потврда за плата може да се добие и утре и другите денови бидејќи системот работи 24 часа.

Деновиве, сепак, е зголемен интензитетот во работењето на УЈП поради поднесувањето на барањата за финансиска поддршка за плати на фирмите кои не зедоа плата во февруари и во март.

До денеска, според податоците на УЈП, за финансиска поддршка за исплата на плати за февруари се доставени вкупно 11.615 барања, додека за март се доставени 11.177.

– УЈП ја потврдила комплетноста на барањата за февруари на вкупно 11.255 фирми и за март на 10. 844 барања – додаваат од таму.

Од УЈП велат дека секојдневно доставуваат налози за исплата на финансиската поддршка до Генералниот секретаријат на Владата.

– Досега се доставени налози за февруари за 5.305 работодавачи во кои се опфатени 29.831 работници, а за март се доставени налози за исплата за 4.835 работодавачи во кои се опфатени 26. 244 работници – велат од УЈП.